‘பாண்டி முனி’ படத்துக்காக ரூ.50 லட்சம் செலவில் அரங்கு
தனுஷ் நடித்த ‘துள்ளுவதோ இளமை,’ ‘காதல் கொண்டேன்,’ ‘யாரடி நீ மோகினி,’ ‘திருவிளையாடல் ஆரம்பம்,’ ‘3’ ஆகிய படங்களை தயாரித்த ஆர்.கே.புரொடக்‌ஷன்ஸ் நிறுவனம் தற்போது, ‘பாண்டி முனி’ என்ற படத்தை தயாரித்து வருகிறது. இதில், முனீஸ்வரசாமி என்ற அகோரி வேடத்தில், ஜாக்கி ஷராப் நடிக்கிறார். கதை-திரைக்கதை-வசனம் எழுதி டைரக்டு செய்கிறார், கஸ்தூரிராஜா. படத்தை பற்றி அவர் கூறுகிறார்:-

‘‘திருவண்ணாமலை அருகே வேட்டவலம் ஜமீனுக்கு சொந்தமான ஒரு குளம் உள்ளது. 5 ஏக்கர் பரப்பளவில் பாறைகள் நிறைந்த பகுதி அது. அந்த குளத்தில், சுமார் 4 ஆயிரம் சதுர அடி அளவுக்கு இரும்பு தூண்கள் மற்றும் பலகைகளை கொண்ட ஒரு அரங்கு அமைக்கப்பட்டது. அதன் மீது அமர்ந்து அகோரி வேடத்தில் ஜாக்கி ஷராப் மற்றும் 400 அகோரிகள் வலம் வருவது போன்ற காட்சி படமாக்கப்பட்டது.

கைலாயத்தை பிரதி எடுத்தது மாதிரியான இந்த அரங்குகள், திரையில் பிரமிப்பை ஏற்படுத்தும். இதற்காக ரூ.50 லட்சம் செலவிடப்பட்டது. என் சினிமா பயணத்தில், ‘பாண்டி முனி’ முக்கியமான படமாக இருக்கும்.’’