பஸ்கள் இயக்கக்கோரி அரசு பஸ்சை சிறைபிடித்து மாணவர்கள் போராட்டம்

மூங்கில்துறைப்பட்டு

மூங்கில்துறைப்பட்டு அருகே பஸ்கள் இயக்கக்கோரி அரசு பஸ்சை சிறைபிடித்து கிராம மக்கள் போராட்டத்தில் ஈடுபட்டதால் பரபரப்பு ஏற்பட்டது.

மூங்கில்துறைப்பட்டு அருகே உள்ளது புதுப்பட்டு கிராமம். இந்த கிராமம் மற்றும் சுற்றியுள்ள புத்திராம்பட்டு, ரங்கப்பனூர், லக்கிநாயக்கன்பட்டி உள்ளிட்ட பல்வேறு பகுதிகளை சேர்ந்த மாணவ–மாணவிகள் மூலக்காட்டில் உள்ள அரசு மாதிரி பள்ளியில் படித்து வருகின்றனர்.

புதுப்பட்டு கிராமத்தில் இருந்து மூலக்காட்டிற்கு பள்ளி மாணவர்கள் செல்வதற்கு காலை நேரங்களில் போதுமான பஸ்கள் இயக்கப்படவில்லை. இதனால் மாணவர்கள் குறிப்பிட்ட நேரத்திற்கு பள்ளிக்கு செல்ல முடியாமல் கடும் அவதியடைந்து வந்தனர். இதுகுறித்து மாணவர்கள் மற்றும் பெற்றோர் உயர் அதிகாரிகளிடம் தெரிவித்தும் இதுவரை நடவடிக்கை எடுக்கப்படவில்லை.

இந்த நிலையில் நேற்று காலையிலும் மாணவர்கள் பள்ளி செல்வதற்காக புதுப்பட்டு பஸ் நிறுத்தத்தில் காத்திருந்தனர். ஆனால் நீண்ட நேரமாகியும் பஸ் வரவில்லை. இதனால் ஆத்திரமடைந்த மாணவர்கள் மற்றும் கிராம மக்கள் சங்கராபுரம்–சேராப்பட்டு சாலையில் புதுப்பட்டு பஸ் நிறுத்தத்தில் திடீரென மறியலில் ஈடுபட்டனர். அப்போது புளியங்கோட்டையில் இருந்து சங்கராபுரம் நோக்கி வந்த அரசு டவுன் பஸ்சை கிராம மக்கள் சிறைபிடித்து போராட்டத்தில் ஈடுபட்டனர். இதனால் அப்பகுதியில் பரபரப்பு ஏற்பட்டது.

இதுபற்றி தகவல் அறிந்த வடபொன்பரப்பி போலீசார் சம்பவ இடத்துக்கு விரைந்து வந்து போராட்டத்தில் ஈடுபட்டவர்களிடம் பேச்சுவார்த்தை நடத்தினர். அதில் இதுகுறித்து உயர் அதிகாரிகளிடம் பேசி, விரைவில் பஸ் இயக்க நடவடிக்கை எடுக்கப்படும் என்று தெரிவித்தனர். இதையேற்ற மாணவர்கள் சிறைபிடித்து வைத்திருந்த பஸ்சை விடுவித்து போராட்டத்தை கைவிட்டு அங்கிருந்து கலைந்து சென்றனர். இந்த சாலை மறியல் போராட்டத்தால் அப்பகுதியில் சிறிது நேரம் போக்குவரத்து பாதிக்கப்பட்டது.