ஜனாதிபதி தேர்தலில் இன்று வாக்குப்பதிவு: புதுச்சேரி எம்.எல்.ஏ.க்கள் ஓட்டுப்போட சட்டசபையில் ஏற்பாடு

புதுடெல்லி,

உலகின் மிகப்பெரிய ஜனநாயக நாடு இந்தியா. இதன், அரசியல் சாசனத்தை கட்டிக்காக்கும் பெருமைக்குரிய இடத்தில் உள்ள ஜனாதிபதி பிரணாப் முகர்ஜியின் பதவிக்காலம், அடுத்த வாரம் முடிகிறது.

இதையொட்டி புதிய ஜனாதிபதியை தேர்ந்தெடுப்பதற்கான தேர்தல் ஜூலை 17-ந் தேதி (இன்று) நடத்தப்படும் என தேர்தல் ஆணையம் அறிவித்தது. அதைத் தொடர்ந்து மத்தியில் ஆளும் பாரதீய ஜனதா கூட்டணியும், எதிர்க்கட்சிகள் அணியும் வேட்பாளர் தேர்வில் மும்முரமாக ஈடுபட்டன.

இறுதியில் இந்த தேர்தலில் சற்றும் எதிர்பாராத வகையில், பீகார் மாநில கவர்னராக இருந்து வந்த ராம்நாத் கோவிந்த் (வயது 71) பாரதீய ஜனதா கூட்டணி வேட்பாளராக அறிவிக்கப்பட்டார். இவர் உத்தரபிரதேச மாநிலத்தைச் சேர்ந்த தலித் இனத்தலைவர் ஆவார்.

இவரை எதிர்த்து காங்கிரஸ் தலைமையிலான 17 எதிர்க்கட்சிகளின் பொது வேட்பாளராக பாராளுமன்ற முன்னாள் சபாநாயகர் மீராகுமார் (72) நிறுத்தப்பட்டுள்ளார். இவர் பீகார் மாநிலத்தைச் சேர்ந்த தலித் இனத்தலைவர் ஆவார்.

பாரதீய ஜனதா கூட்டணி வேட்பாளர் ராம்நாத் கோவிந்த், பிரதமர் நரேந்திர மோடி, பாரதீய ஜனதா கட்சி தலைவர் அமித் ஷா மற்றும் அந்த கட்சியின் மூத்த தலைவர்கள், மாநில முதல்-மந்திரிகள் முன்னிலையில் தனது வேட்பு மனுவை கடந்த 23-ந் தேதி பாராளுமன்ற மக்களவை தலைமைச்செயலாளர் அனுப் மிஷ்ராவிடம் தாக்கல் செய்தார்.

எதிர்க்கட்சிகளின் பொது வேட்பாளர் மீராகுமார், காங்கிரஸ் தலைவர் சோனியா காந்தி, முன்னாள் பிரதமர் மன்மோகன் சிங் மற்றும் அந்த கட்சியின் மூத்த தலைவர்கள், கூட்டணி கட்சி தலைவர்கள் முன்னிலையில் தனது வேட்புமனுவை சென்ற 28-ந் தேதி தாக்கல் செய்தார்.

அதைத் தொடர்ந்து ஜனாதிபதி தேர்தல் களம் சூடு பிடித்தது. இரு வேட்பாளர்களும் தமிழ்நாடு உள்பட நாடு முழுவதும் சூறாவளி சுற்றுப்பயணம் செய்து, எம்.பி.க்கள், எம்.எல்.ஏ.க்களை சந்தித்து ஆதரவு திரட்டினர்.

இந்த தேர்தலில் 776 தேர்ந்தெடுக்கப்பட்ட எம்.பி.க்கள், 4,120 எம்.எல்.ஏ.க்கள் என மொத்தம் 4,896 பேர் வாக்குரிமை பெற்றுள்ளனர். (எம்.பி.க்களில் 543 பேர் மக்களவை உறுப்பினர்கள், 233 பேர் டெல்லி மேல்-சபை உறுப்பினர்கள்).

ஒரு எம்.பி.யின் ஓட்டு மதிப்பு 708 ஆகும். ஆனால் எம்.எல்.ஏ.க்கள் ஓட்டின் மதிப்பு, அந்தந்த மாநில மக்கள் தொகைக்கு ஏற்ப மாறுபடும். இந்த நிலையில் இன்று (திங்கட்கிழமை) ஜனாதிபதி தேர்தலில் ஓட்டுப்பதிவு நடக்கிறது. டெல்லியில் பாராளுமன்ற வளாகத்திலும், தமிழ்நாட்டில் சென்னையில் அமைந்துள்ள சட்டசபை வளாகத்திலும், இதே போன்று பிற மாநிலங்களில் உள்ள சட்டசபை வளாகங்களிலும் வாக்குச்சாவடிகள் அமைக்கப்பட்டுள்ளன. அந்த வகையில் மொத்தம் 32 வாக்குச்சாவடிகள் அமைக்கப்பட்டுள்ளன.

தமிழக சட்டசபை வளாகத்தில் அமைக்கப்பட்டுள்ள வாக்குச்சாவடியில் தமிழக எம்.எல்.ஏ.க்கள் ஓட்டுப்போடுகிறார்கள்.

புதுவையைச் சேர்ந்த எம்.எல்.ஏ., எம்.பி.க்கள் ஓட்டுப் போடுவதற்கு வசதியாக சட்டமன்ற வளாகத்தில் உள்ள கமிட்டி அறையில் வாக்குச்சாவடி அமைக்கப்பட்டுள்ளது. புதுவை மாநிலத்தை சேர்ந்த எம்.எல்.ஏ.க்கள் 30 பேர் இங்கு ஓட்டு போடுகின்றனர். எம்.பி.க்கள் இருவரும் டெல்லியில் ஓட்டுப் போட உள்ளனர். ஓட்டுப்பதிவையொட்டி சட்டமன்ற வளாகம் முழுவதும் பலத்த போலீஸ் பாதுகாப்பு போடப்பட்டுள்ளது.

இந்த ஏற்பாடுகளை பார்வையிட தேர்தல் பார்வையாளராக நியமிக்கப்பட்டுள்ள மத்திய அரசின் புள்ளியியல் துறை இணை செயலாளர் அருண்குமார் யாதவ் நேற்று புதுவை வந்தார். சட்டமன்ற வளாகத்தில் அமைக்கப்பட்டுள்ள வாக்குச்சாவடியை அவர் நேரில் ஆய்வு செய்தார். தற்போது வாக்குப்பெட்டி, வாக்குச்சீட்டுகள் வைக்கப்பட்டுள்ள இடம், வாக்குப்பதிவு நடக்கும் அறை ஆகியவற்றை பார்வையிட்டார். வாக்குப்பதிவுக்கான ஏற்பாடுகள் குறித்து அதிகாரிகளிடம் கேட்டறிந்தார்.

இந்த ஆய்வின்போது புதுவை தலைமை தேர்தல் அதிகாரி கந்தவேலு, கூடுதல் தலைமை தேர்தல் அதிகாரி குமார், துணை தலைமை தேர்தல் நடத்தும் அதிகாரி தில்லைவேலு, புதுவை சட்டசபை செயலாளரும் உதவி தேர்தல் நடத்தும் அதிகாரியுமான வின்சென்ட்ராயர், செய்தி மற்றும் விளம்பரத்துறை இயக்குனர் உதயகுமார் ஆகியோர் உடனிருந்தனர்.

புதுவையை பொறுத்தவரை அ.தி.மு.க., என்.ஆர். காங்கிரஸ் ஆகிய கட்சிகளுக்கு தலா ஒரு எம்.பி.க்கள் உள்ளனர்.

கட்சி வாரியாக உள்ள எம்.எல்.ஏ.க்கள் விவரம் வருமாறு:- காங்கிரஸ்-15, தி.மு.க.- 2, என்.ஆர்.காங்கிரஸ்- 8, அ.தி.மு.க.-4, சுயேச்சை-1 என உள்ளனர். இதில் எம்.பி.க்களின் வாக்கு மதிப்பு 708 ஆகும். எம்.எல்.ஏ.க்களின் வாக்குமதிப்பு 16. புதுவையில் காங்கிரஸ் ஆட்சி நடந்தாலும் இந்த மாநிலத்தை பொறுத்தவரை ஜனாதிபதி தேர்தலில் காங்கிரஸ் வேட்பாளரைவிட பாரதீய ஜனதா வேட்பாளருக்கே அதிக வாக்குகள் கிடைக்க வாய்ப்பு உள்ளது.

ஜனாதிபதி தேர்தலையொட்டி பிரதமர் நரேந்திர மோடி, காங்கிரஸ் தலைவர் சோனியா காந்தி மற்றும் வாக்குரிமை பெற்றுள்ள அனைத்துக் கட்சி தலைவர்களும் பாராளுமன்றத்துக்கு இன்று வருவதாலும், மழைக்கால கூட்டத்தொடர் தொடங்குவதாலும் பலத்த பாதுகாப்பு ஏற்பாடுகள் செய்யப்பட்டுள்ளன.

வாக்குச்சாவடிகளுக்கு ஓட்டுப்பெட்டிகளும், வாக்குச்சீட்டுகளும், பிற சாதனங்களும் போய்ச்சேர்ந்து விட்டன. இன்று காலை 10 மணிக்கு ஓட்டுப்பதிவு தொடங்குகிறது. மாலை 5 மணிக்கு ஓட்டுப்பதிவு முடிகிறது. ஓட்டுப்பதிவை தேர்தல் கமிஷனின் 33 பார்வையாளர்கள் மேற்பார்வையிடுகிறார்கள். எம்.பி.க்களுக்கான வாக்குச்சீட்டுகள் பச்சை நிறத்திலும், எம்.எல்.ஏ.க்களின் ஓட்டுச்சீட்டுகள் இளஞ்சிவப்பு நிறத்திலும் இருக்கும்.

வாக்காளர்களான எம்.பி.க்களும், எம்.எல்.ஏ.க்களும் ஓட்டுச்சீட்டில் இடம்பெற்றிருக்கிற 2 வேட்பாளர்களில் 1, 2 என்று தங்கள் முதல் தேர்வையும், இரண்டாவது தேர்வையும் வரிசைப்படுத்தி எழுதி ஓட்டுப்போட வேண்டும்.

இதற்கான பிரத்யேக பேனாவை வாக்காளர்களுக்கு தேர்தல் கமிஷன் வழங்குகிறது. ஓட்டுப்போட செல்வதற்கு முன் வாக்குச்சாவடியில் எம்.பி.க்கள். எம்.எல்.ஏ.க்களின் சொந்த பேனாக்களை அங்கிருக்கிற அலுவலர் வாங்கிக்கொண்டு விடுவார். அவர்கள் தேர்தல் கமிஷன் வழங்குகிற தொடர் எண்களைக் கொண்ட பேனாவை பெற்றுச்சென்று, ஓட்டுப்போட்டு விட்டு வந்தபின்னர், அவர்களது பேனாக்கள் திரும்ப ஒப்படைக்கப்பட்டு விடும்.

தேர்தல் கமிஷன் வழங்குகிற பிரத்யேக பேனாவில் வைலட் நிற மை பயன்படுத்தப்படுகிறது. இந்த பேனாக்களை, மைசூர் பெயிண்ட்ஸ் அண்ட் வார்னி லிமிடெட்டில் இருந்து தேர்தல் கமிஷன் வாங்கி உள்ளது. இந்த நிறுவனம்தான் வாக்காளர்கள் கை விரலில் வைக்கிற அழியாத மையை தேர்தல் கமிஷனுக்கு வினியோகிக்கிறது.

கடந்த ஆண்டு அரியானா மாநிலத்தில் நடந்த டெல்லி மேல்-சபை தேர்தலில் பயன்படுத்தப்பட்ட பேனா மையினால் ஏற்பட்ட சர்ச்சையால்தான், இந்த தேர்தலில் முதல் முறையாக தேர்தல் கமிஷன் பிரத்யேக பேனாக்களை பயன்படுத்த முடிவு செய்துள்ளது.

வாக்குச்சாவடியில் வாக்காளர்களான எம்.பி.க்கள், எம்.எல்.ஏ.க்கள் என்னவெல்லாம் செய்ய வேண்டும், என்னவெல்லாம் செய்யக்கூடாது என கூறுகிற குறிப்புகளை கொண்ட சிறப்பு ‘போஸ்டர்’களையும் தேர்தல் கமிஷன் இந்த தேர்தலில் முதல் முறையாக அறிமுகம் செய்கிறது. ஜனாதிபதி தேர்தலில் எந்த கட்சியும் இந்த வேட்பாளருக்குத்தான் ‘முதல்’ ஓட்டு போட வேண்டும் என்று கொறடா உத்தரவு போட முடியாது.

பாராளுமன்ற வளாக வாக்குச்சாவடியில் வைக்கப்படுகிற ஓட்டுப்பெட்டிகள், வாக்குப்பதிவு முடிந்தவுடன் ‘சீல்’ வைக்கப்பட்டு அங்குள்ள அறையில் துப்பாக்கி ஏந்திய போலீசார் பாதுகாப்பில் வைக்கப்படும்.

இதே போன்று மாநில சட்டசபைகளில் அமைக்கப்பட்டுள்ள வாக்குச்சாவடிகளில் பயன்படுத்தப்படுகிற வாக்குப்பெட்டிகளும் ஓட்டுப்பதிவு முடிந்து ‘சீல்’ வைத்து டெல்லிக்கு அனுப்பிவைக்கப்படும். வருகிற 20-ந் தேதி (வியாழக்கிழமை) காலை 11 மணிக்கு ஓட்டு எண்ணிக்கை தொடங்குகிறது. அதே நாளில் முடிவு அறிவிக்கப்பட்டு விடும்.

இந்த தேர்தலில் மத்தியில் ஆளும் பாரதீய ஜனதா கூட்டணி வேட்பாளர் ராம்நாத் கோவிந்துக்கு பாரதீய ஜனதா, அதன் கூட்டணி கட்சிகள், கூட்டணியில் இடம் பெறாத ஐக்கிய ஜனதாதளம், அ.தி.மு.க. உள்ளிட்ட கட்சிகளின் ஆதரவால் 60 சதவீதத்துக்கும் மேலான ஆதரவு உள்ளதால், அவர் வெற்றி பெறுவதற்கான வாய்ப்பு அதிகம் உள்ளதாக அரசியல் நோக்கர்கள் கருதுகின்றனர்.

புதிய ஜனாதிபதி 25-ந் தேதி பதவி ஏற்கிறார் என்பது குறிப்பிடத்தக்கது.