காட்டுப்பன்றியை வேட்டையாடிய 2 பேர் கைது நாட்டுத்துப்பாக்கி பறிமுதல்

தர்மபுரி,

தர்மபுரி வனச்சரகம் தொப்பூர் காப்புக்காட்டில் சிலர் வனவிலங்குகளை வேட்டையாடுவதாக தர்மபுரி வனச்சரகர் ராஜலிங்கத்திற்கு ரகசிய தகவல் கிடைத்தது. இதுகுறித்து நடவடிக்கை எடுக்க அவர் உத்தரவிட்டார். அதன்பேரில் வனத்துறையினர் தொப்பூர் காப்புக்காட்டில் தீவிர ரோந்து பணியில் ஈடுபட்டனர். அப்போது வனப்பகுதியில் 2 பேர் துப்பாக்கியுடன் சென்று கொண்டிருந்தனர். வனத்துறையினரை பார்த்ததும் அவர்கள் அங்கிருந்து தப்பி ஓட முயன்றனர். அவர்களை வனத்துறையினர் மடக்கி பிடித்து விசாரணை மேற்கொண்டனர். அதில், அவர்கள் நார்த்தம்பட்டியைச் சேர்ந்த வீரன், பெரியசாமி என்பதும், இருவரும் காட்டுப்பன்றியை வேட்டையாடியதும் தெரியவந்தது.

இதையடுத்து இருவரையும் வனத்துறையினர் கைது செய்தனர். இருவருக்கும் தலா ரூ.35,000 வீதம் மொத்தம் ரூ.70,000 அபராதம் விதிக்கப்பட்டது. மேலும் அவர்களிடம் இருந்த நாட்டுத்துப்பாக்கி, காட்டுப்பன்றி இறைச்சி ஆகியவை பறிமுதல் செய்யப்பட்டது.