நீடாமங்கலம் அருகே பள்ளத்தில் ஆம்னி பஸ் கவிழ்ந்தது 7 பேர் படுகாயம்

நீடாமங்கலம்,

கோவையில் இருந்து நாகை மாவட்டம் வேளாங்கண்ணியை நோக்கி நேற்று காலை ஒரு ஆம்னி பஸ் சென்று கொண்டிருந்தது. அப்போது தஞ்சை-நீடாமங்கலம் நெடுஞ்சாலையில் திருவாரூர் மாவட்ட எல்லை பகுதியான கோவில்வெண்ணி குச்சுப்பாளையம் பிரிவு சாலையில் வந்தபோது சாலையோரத்தில் இருந்த பள்ளத்தில் எதிர்பாராதவிதமாக ஆம்னி பஸ் கவிழ்ந்தது.

இதில் பஸ்சில் பயணம் செய்த கோவையை சேர்ந்த அந்தோணி (வயது 21), மரியசெல்வி (41), கியூபா(23), விக்கி (19), திருக்கண்ணமங்கையை சேர்ந்த பக்கிரிசாமி, சஞ்சீவ், உமா ஆகிய 7 பேரும் படுகாயம் அடைந்தனர். இதுகுறித்து தகவல் அறிந்த நீடாமங்கலம் போலீஸ் இன்ஸ்பெக்டர் பழனிச்சாமி மற்றும் போலீசார் சம்பவ இடத்திற்கு விரைந்து வந்து படுகாயமடைந்த 7 பேரையும் மீட்டு நீடாமங்கலம் அரசு மருத்துவமனைக்கு சிகிச்சைக்காக அனுப்பி வைத்தனர். அங்கு அவர்கள் சிகிச்சை பெற்று வருகின்றனர். மேலும், இதுதொடர்பாக போலீசார் வழக்குப்பதிவு செய்து விசாரணை நடத்தி வருகின்றனர்.