வேணாநல்லூர் கிராமத்தில் ஜல்லிக்கட்டு காளைகளை அடக்கிய வீரர்கள் பரிசை தட்டி சென்றனர்

தா.பழூர்,

அரியலூர் மாவட்டம் தா.பழூர் அருகே உள்ள வேணாநல்லூர் கிராமத்தில் நேற்று ஜல்லிக்கட்டு போட்டி நடைபெற்றது. இதையொட்டி நாச்சியார் கோவில் திடலில் வாடிவாசல் அமைக்கப்பட்டது. முன்னதாக மாரியம்மன் கோவிலில் வழிபாடு நடத்தி பின்னர் சீர்வரிசை தட்டுகளுடன் வாடிவாசலுக்கு காளைகளை அழைத்து வந்தனர். முதலில் காளைகளுக்கு மருத்துவ பரிசோதனை நடைபெற்றது. அதைத்தொடர்ந்து வாடிவாசலில் இருந்து அலங் கரிக்கப்பட்ட காளைகள் ஒவ்வொன்றாக அவிழ்த்து விடப்பட்டன.

இதில் 200-க்கும் மேற்பட்ட மாடுபிடி வீரர்கள் கலந்து கொண்டு சீறிப்பாய்ந்து வந்த காளைகளை போட்டி போட்டு அடக்கினர். அப்போது வாடிவாசலின் இரு புறங்களிலும் நின்று போட்டியை ரசித்து பார்ந்த பொதுமக்கள் கைத்தட்டி ஆரவாரம் செய்தனர். சில காளைகள் வீரர்களை தூக்கி வீசி பந்தாடின.

இதில் அவணியாபுரம், திருச்சி, மணப்பாறை, லால்குடி, புள்ளம்பாடி, சேலம், கரூர், புதுக்கோட்டை, அரியலூர், ஜெயங்கொண்டம் உள்ளிட்ட இடங்களில் இருந்து வந்திருந்த 500-க்கும் மேற்பட்ட காளைகள் அவிழ்த்து விடப்பட்டன. காளைகள் முட்டியதில் கோட்டியால் கிராமத்தை சேர்ந்த ராமசாமி (வயது 60) என்பவர் காயம் அடைந்தார். அவருக்கு அங்கிருந்த மருத்துவக் குழுவினரால் சிகிச்சை அளிக்கப்பட்டது.

ஜல்லிக்கட்டு போட்டியில் காளைகளை அடக்கிய வீரர்களுக்கும், வீரர்களிடம் பிடிபடாத காளைகளின் உரிமையாளர்களுக்கும் விழா குழுவினரால் வெள்ளி நாணயங்கள், செல்போன், கட்டில், பீரோ, மின்விசிறி, ரூ.5 ஆயிரம் வரையிலான பணமுடிப்பு போன்ற பரிசு பொருட்கள் வழங்கப்பட்டன. இந்த போட்டியில் சிறந்த காளைகள் தேர்வு செய்யப்பட்டு அதன் உரிமையாளர்களுக்கு சிறப்பு பரிசு வழங்கப்பட்டது.

இதில் அவணியாபுரம், திருச்சி, மணப்பாறை, லால்குடி, புள்ளம்பாடி, சேலம், கரூர், புதுக்கோட்டை, அரியலூர், இருகையூர், வேணாநல்லூர், கோடியால், சுத்தமல்லி, வி.கைகாட்டி, ஜெயங்கொண்டம் மற்றும் தா.பழூர் சுற்றுவட்டாரத்தை சேர்ந்த திரளான பொதுமக்கள் கலந்து கொண்டு ஜல்லிக்கட்டு போட்டியை கண்டு களித்தனர். ஜல்லிக்கட்டு போட்டிக்கான ஏற்பாடுகளை விழாக்குழுவினர் மற்றும் வேணாநல்லூர் கிராம பொதுமக்கள் செய்திருந்தனர்.