முன்னாள் ராணுவ வீரர் மனைவியிடம் 4½ பவுன் நகை பறிப்பு முகமூடி கும்பல் கைவரிசை

சிப்காட் (ராணிப்பேட்டை),

மேல்பாடி அருகே மகிமண்டலம்புதூர் கிராமத்தை சேர்ந்தவர் ருக்மாங்கதன், ஓய்வு பெற்ற ராணுவ வீரர். இவருடைய மனைவி லதா (வயது 45). இவர்களுக்கு 2 மகள்கள் உள்ளனர்.

இந்த நிலையில் நேற்று முன்தினம் இரவு 4 பேரும் வீட்டில் தூங்கிக் கொண்டிருந்தனர். நள்ளிரவு கதவு தட்டப்படும் சத்தம் கேட்டது. இதையடுத்து லதா கதவை திறந்தார்.

கத்தியை காட்டி நகை பறிப்பு

அப்போது முகமூடி அணிந்த 4 பேர் கொண்ட கும்பல் லதாவிடம் கத்தியை காட்டி மிரட்டினர். பின்னர் அவர் கழுத்தில் இருந்த 4½ பவுன் நகையை பறித்துக் கொண்டு மின்னல் வேகத்தில் தப்பி சென்று விட்டனர்.

இதனால் அதிர்ச்சி அடைந்த லதா கூச்சல் போட்டார். சத்தம் கேட்டதும் அக்கம்பக்கத்தில் இருந்தவர்கள் ஓடி வந்தனர். அவர்கள் 4 பேர் கொண்ட கும்பலை தேடினர். ஆனால் அவர்கள் கிடைக்கவில்லை.

இதுகுறித்து மேல்பாடி போலீசில் புகார் செய்யப்பட்டது. இதையடுத்து மோப்ப நாய் சிம்பா வரவழைக்கப்பட்டு சம்பவ இடத்தில் இருந்து மகிமண்டலம்புதூர் - பொன்னை சாலை வழியாக சென்று நின்று விட்டது. யாரையும் கவ்வி பிடிக்கவில்லை.

முகமூடி கும்பலுக்கு வலைவீச்சு

மேல்பாடி போலீசார் வழக்குப்பதிவு செய்து நகையை பறித்து சென்ற முகமூடி கும்பலை தேடி வருகின்றனர்.

இந்த சம்பவம் அந்த பகுதியில் பெரும் பரபரப்பை ஏற்படுத்தியது.