வினோதமான திருமண பந்தம்

உத்தரகாண்ட் மாநிலம் டேராடூன் மாவட்டத்தில் இருக்கிறது, மோரேனா என்ற மலை கிராமம். இந்த கிராமத்தில் ஆண்களை விட, பெண்களின் எண்ணிக்கை குறைவாக இருக்கிறது. அதனால் திருமண விஷயத்தில் வினோதமான சம்பிரதாயத்தை பின்பற்றுகிறார்கள். ஒரு குடும்பத்தில் எத்தனை அண்ணன்-தம்பிகள் இருந்தாலும் அவர்கள் அனைவருக்கும் ஒரு பெண்ணே மனைவியாகிறாள். இது கேட்பதற்கு விசித்திரமாக இருந்தாலும், மோரேனா கிராமத்தின் நடைமுறை இதுதான்.

ஒரு பெண், ஒரே ஆணை திருமணம் செய்து கொள்ளும் நிகழ்வு எப்போதாவது அரங்கேறுகிறது. அதேநேரத்தில் 6 முதல் 8 ஆண்களை திருமணம் செய்து கொண்ட பெண்களும் இருக்கிறார்கள்.

மோரேனா கிராமம் மட்டுமின்றி, சுற்றுப்புற கிராமங் களிலும் இதே பாரம்பரியத்தை கிராம சட்டமாக கடைப்பிடிக்கிறார்கள். “இதை வினோதமாக பார்க்காதீர்கள். இந்த பழக்கம், மகாபாரத கதையில் இருந்து பின்பற்றப்படுகிறது. ஆரம்பத்தில் ஒரு குடும்பத்தில் பிறக்கும் 5 சகோதரர்களை திருமணம் முடிக்கும் பழக்கம் தொடங்கி, இன்று 8 ஆண்களை மணமுடிக்கும் வரை நீண்டிருக் கிறது. இதை கிராம பெண்கள் சாபமாக கருதுவதில்லை. வரமாக பார்க்கிறார்கள். ஏனெனில் பாஞ்சாலியை போன்று வாழ எங்களை போன்ற பெண்களுக்கு வரம் கிடைத்திருக்கிறது” என்று பேசுகிறார், ராஜோ வர்மா. மோரேனா கிராமத்தை சேர்ந்தவரான இவர், 5 சகோதரர்களை மணமுடித்து சந்தோஷமாக வாழ்கிறார். இவர்களுக்கு ஒரு மகன் பிறந்தபோதிலும், அவனது தந்தையை கண்டறிவது கடினமான காரியமாக சொல்கிறார்.