நெரிஞ்சிப்பேட்டை கதவணையில் உடைந்த ஷட்டர்களை சீரமைக்கும் பணி தீவிரம்

எடப்பாடி,

மேட்டூர் அணையில் இருந்து காவிரி ஆற்றில் திறந்துவிடப்படும் தண்ணீர் பல பகுதிகளில் தேக்கப்பட்டு மின்சாரம் தயாரிக்கப்படுகிறது. இதற்காக சேலம் மாவட்டம் செக்கானூரில் முதல் கதவணையும், எடப்பாடி அருகே நெரிஞ்சிப்பேட்டையில் 2-வது கதவணையும் உள்ளது.இந்த கதவணையில் சுமார் 30 அடிக்கு தண்ணீர் தேக்கப்பட்டு மின்சாரம் தயாரிக்கப்படுகிறது. 2 எந்திரங்கள் மூலம் தலா 15 மெகாவாட் மின்சாரம் தயார் ஆகிறது.

இந்த கதவணை மின்நிலையத்தில் 13-வது மதகு 1-ந் தேதி அன்றும், 8-ந் தேதி அன்று 7-வது மதகும் உடைந்து தேக்கி வைக்கப்பட்டு இருந்த தண்ணீர் வீணாக வெளியேறியது. இதை குறைக்க மின்சாரம் தயாரிக்கும் மதகு மூலமாக 1,500 கனஅடி தண்ணீர் வெளியேற்றப்பட்டது. இதனால் மின்உற்பத்தியும் பாதிக்கப்பட்டது. கதவணையில் இருந்து தண்ணீர் வெளியேறியதால், பூலாம்பட்டி-நெரிஞ்சிப்பேட்டை இடையே நடைபெற்று வந்த விசைப்படகு போக்குவரத்து நிறுத்தப்பட்டு சிறுவிசைப்படகு போக்குவரத்து மட்டும் நடைபெற்று வருகிறது.

இந்நிலையில் 7-வது மதகில் உடைந்த ஷட்டரை மேலே தூக்கிவிட்டு தற்காலிக ஷட்டர் அமைக்கப்பட்டது. அதனைத்தொடர்ந்து நேற்று மின்சார வாரிய ஊழியர்கள் மற்ற மதகுகளில் ஏதேனும் உடைப்பு, அரிப்பு ஏற்பட்டுள்ளதா? என சோதனை செய்து சீரமைப்பு பணியில் தீவிரமாக ஈடுபட்டனர்.