கபினி அணையை திறக்க வலியுறுத்தி கர்நாடகாவுக்கு செல்ல முயன்ற விவசாயிகளை போலீசார் நிறுத்தினர்

ஓசூர்,

தஞ்சாவூர், நாகை, திருவாரூர் உள்ளிட்ட காவிரி டெல்டா மாவட்டங்களில் சம்பா சாகுபடிக்காக கடந்த அக்டோபர் மாதம் 2-ந்தேதி மேட்டூர் அணை திறக்கப்பட்டது. இந்த நிலையில் கர்நாடகா உரிய நீரை தராததின் காரணமாகவும், பருவமழை கைகொடுக்காததாலும் மேட்டூர் அணையின் நீர்மட்டம் மளமளவென்று சரிந்தது. விவசாயத்திற்கு போதிய தண்ணீர் கிடைக்காததால் காவிரி டெல்டா மாவட்டங்களில் பயிர்கள் கருக தொடங்கி உள்ளது.

இந்த பயிர்களை காக்க தண்ணீர் தேவைப்படுவதால் கர்நாடகாவிடம் இருந்து உரிய தண்ணீரை தமிழக அரசு கேட்டு பெற்று தர வேண்டும் என்று விவசாயிகள் கோரிக்கை வைத்தனர். இந்த நிலையில் கர்நாடக மாநிலத்தில் உள்ள கபினி அணையை திறக்க வலியுறுத்தி தமிழக அனைத்து விவசாயிகள் சங்கங்களின் ஒருங்கிணைப்பு குழு சார்பில் நேற்று கர்நாடகாவிற்குள் நுழையும் போராட்டம் நடத்தப்படும் என்று அதன் ஒருங்கிணைப்பாளர் பி.ஆர்.பாண்டியன் அறிவித்திருந்தார்.

அதன்படி திருவாரூர் மாவட்டம் மன்னார்குடியில் இருந்து நேற்று காலை 16 வாகனங்களில் 150-க்கும் மேற்பட்ட விவசாயிகள் புறப்பட்டனர். அவர்கள் தஞ்சாவூர், திருச்சி, நாமக்கல், சேலம், கிருஷ்ணகிரி வழியாக நேற்று மாலை ஓசூர் வந்தனர். அவர்கள் ஓசூர் இ.எஸ்.ஐ. மருத்துவமனை அருகில் தமிழக-கர்நாடக மாநில எல்லையான ஓசூர் ஜூஜூவாடி பக்கமாக மாலை 6 மணி அளவில் வந்து கொண்டிருந்தனர்.

அப்போது அங்கு பாதுகாப்பு பணியில் ஈடுபட்டிருந்த கிருஷ்ணகிரி மாவட்ட போலீஸ் சூப்பிரண்டு மகேஷ்குமார் தலைமையிலான 100-க்கும் மேற்பட்ட போலீசார் விவசாயிகளை தடுத்து நிறுத்தினார்கள். இதையடுத்து விவசாய சங்க ஒருங்கிணைப்பாளர் பி.ஆர்.பாண்டியன் தலைமையில் விவசாயிகள் ஓசூர்-பெங்களூரு பிரதான தேசிய நெடுஞ்சாலையில் அமர்ந்து சாலை மறியலில் ஈடுபட்டனர். இதனால் பரபரப்பு ஏற்பட்டது. அவர்களிடம் போலீசார் சமாதான பேச்சுவார்த்தை நடத்தினார்கள். இதைத்தொடர்ந்து அவர்கள் மறியலை கைவிட்டனர்.

இந்த போராட்டம் குறித்து தமிழக அனைத்து விவசாயிகள் சங்கங்களின் ஒருங்கிணைப்பாளர் பி.ஆர்.பாண்டியன் நிருபர்களிடம் கூறியதாவது:-

காவிரி டெல்டா பகுதியில் பயிர்கள் கருக தொடங்கி விட்டது. கருகும் பயிரை பார்த்து விவசாயிகள் வயலில் விழுந்து இறந்து வருகிறார்கள். உச்சநீதிமன்றம் உத்தரவிட்டும் கூட அதை கர்நாடக அரசு ஏற்க மறுப்பதை அனுமதிக்க முடியாது. ராகுல்காந்தி கர்நாடகாவில் தேர்தல் பிரசாரம் மேற்கொண்டுள்ளார். இந்த நேரத்தில் கபினி அணையை திறக்க சென்றோம். ஆனால் எங்களை கர்நாடகா செல்ல விடாமல், தமிழக அரசு காவல்துறை மூலம் அடக்குமுறையை கையாளுகிறது.

ஒட்டு மொத்தமாக பா.ஜனதா கட்சி தமிழக விவசாயிகளை வஞ்சித்து வருகிறது. கர்நாடக அரசு ஒரு சொட்டு தண்ணீரை கூட கொடுக்க மறுக்கிறது. விவசாயிகள் அழிவதற்கு மத்திய அரசு பொறுப்பேற்க வேண்டும். கர்நாடக அரசு தண்ணீரை திறந்து விட வலியுறுத்தி பிரதமர் மோடிக்கு, தமிழக முதல்-அமைச்சர் எடப்பாடி பழனிசாமி அழுத்தம் கொடுக்க வேண்டும்.

உடனடியாக தமிழகத்தில் அனைத்து கட்சி கூட்டத்தை கூட்டி, பிரதமர் மோடிக்கு அழுத்தம் தர வேண்டும். காவிரி உரிமையை மீட்க வேண்டும். அதை அவர்கள் செய்ய தவறுவதால் தான் நாங்கள் கபினியை திறப்பதற்காக இன்றைய(நேற்று) தினம் புறப்பட்டோம்.

இவ்வாறு அவர் கூறினார்.

இந்த போராட்டத்தில் நாகை மாவட்ட நிர்வாகி ராமதாஸ், ஒருங்கிணைப்பு குழு பொருளாளர் ஸ்ரீதர், புண்ணியமூர்த்தி உள்பட பலர் கலந்து கொண்டனர். மாநில எல்லையில் நடந்த திடீர் சாலை மறியல் காரணமாக சிறிது நேரம் போக்குவரத்து பாதிக்கப்பட்டது. மேலும் தமிழக விவசாய அமைப்புகள் கர்நாடகாவில் நுழைந்து போராட்டம் நடத்த உள்ளனர் என்ற தகவல் அறிந்து கர்நாடக மாநிலம் அத்திப்பள்ளி போலீசார் அந்த மாநில எல்லையில் உஷார்படுத்தப்பட்டனர். அவர்கள் தமிழக-கர்நாடக மாநில எல்லையான அத்திப்பள்ளியில் நினைவு வளைவு அருகில் கண்காணிப்பு பணியில் ஈடுபட்டுள்ளனர்.