கால்வாய் நீரில் மூழ்கி தந்தை, மகன்கள் பலி

நாசிக்,

நாசிக் மாவட்டம் யோலா நகர் பகுதியை சேர்ந்தவர் சோம்நாத் கிதே(வயது 38). இவர் தன் மகன்கள் கார்த்திக்(14) மற்றும் சத்யம்(11) ஆகியோருடன் அருகில் உள்ள கால்வாயில் தண்ணீர் எடுக்க சென்றனர்.

அப்போது சோம்நாத் கிதே கால் இடறி கால்வாயில் விழுந்தார். அவர் தண்ணீரில் நிலைகொள்ள முடியாமல் போராடுவதை பார்த்து அதிர்ச்சி அடைந்த மகன்கள் இருவரும் அவரை காப்பாற்ற கால்வாயில் குதித்தனர். ஆனால் 3 பேரும் தண்ணீரில் மூழ்கி பரிதாபமாக உயிரிழந்தனர். அவர்களின் உடல்களை போலீசார் மீட்டு பிரேத பரிசோதனைக்கு அனுப்பி வைத்தனர். மேலும் சம்பவம் குறித்து வழக்குப்பதிவு செய்து விசாரணை நடத்தி வருகின்றனர்.