தஞ்சை மாவட்டத்தில் இயற்கை வளங்களை பாதுகாக்க ரூ.130 கோடியில் பணிகள்

தஞ்சாவூர்,

தஞ்சை மாவட்டத்தில் 589 ஊராட்சிகள் உள்ளன. இந்த பகுதிகளில் தேசிய ஊரக வேலை உறுதி திட்டத்தின் கீழ் 2017-18-ம் ஆண்டில் இதுவரை ரூ.130 கோடியில் பணிகள் மேற்கொள்ளப்பட்டுள்ளன. இதில் 82 லட்சம் மனிதசக்தி நாட்கள் பல்வேறு வேலைக்காக பயன்படுத்தப்பட்டுள்ளன. இது தஞ்சை மாவட்டத்துக்கு நிர்ணயிக்கப்பட்ட இலக்கீட்டில் 85 சதவீதம் ஆகும்.

இதில் இயற்கை வளங்களை பாதுகாக்கும் வகையில் வாய்க்கால், ஆற்றுப்பகுதிகளில் சிற்றோடைகள் மற்றும் பொது இடங்களில் அமைந்துள்ள குடிநீர் குழாய்களில் இருந்து வெளியேறும் நீரை சேமித்தல், வீடுகளில் இருந்து வெளியேறும் கழிவுநீரை பூமிக்குள் அனுப்பும் வகையில் நீர் உறிஞ்சும் குழிகள் அமைக்கப்பட்டு வருகின்றன.

இதன் மூலம் நிலத்தடி நீர் மட்டம் உயரும். மேலும் ஆங்காங்கே தண்ணீர் தேங்கி நின்று அதன் மூலம் கொசுக்கள் உற்பத்தியாகி டெங்கு, சிக்கன்குனியா போன்ற நோய்கள் பரவுவதும் தடுக்கப்படும். இதன் மூலம் வீடு, கிராமங்கள் சுத்தமாக இருக்கும். கிராமப்பகுதிகளில் உள்ள விவசாயிகள் பயன்பெறும் வகையில் உரக்குழிகளும் அமைக்கப்பட்டு வருகின்றன. கால்நடைகளில் இருந்து பெறப்படும் சாணங்களை, உரக்குழிகள் ஏற்படுத்தி அதில் மண்புழு உரம் தயாரித்து விவசாயத்துக்கு பயன்படுத்தும் வகையிலும் திட்டம் செயல்படுத்தப்பட்டு வருகிறது. இதன் மூலம் சாலையோரங்களில் ஆடு, மாடுகளின் சாணங்கள் சேகரிப்பது தடுக்கப்படும்.

இதன் மூலம் அதிக தழைச்சத்து உரம் தயாரிக்கப்பட்டு விவசாயிகளுக்கு பயனுள்ளதாக இருக்கும். இந்த திட்டங்களில் பயன்பெற கிராம புறங்களை சேர்ந்தவர்கள் அந்தந்த பகுதியில் உள்ள வட்டாரவளர்ச்சி அதிகாரிகளை அணுகி விண்ணப்பித்து பயன்பெறலாம். இந்த நீர் உறிஞ்சுக்குழிகள், உரக்குழிகள் இலவசமாக அமைக்கப்படுகின்றன. இந்த குழிகள் அமைப்பதற்கு தேசிய ஊரக வேலை உறுதித்திட்டத்தின் தொழிலாளர்கள் பயன்படுத்தப்பட்டு வருகிறார்கள்.

அனைத்து கிராமங்களிலும் நீரை சேமிக்கும் வகையில் சிறு, குறு, விவசாயிகளின் வயல்களில் மண் வரப்புகள் அமைக்கப்பட்டு வருகின்றன. இதன் மூலம் மண் அரிப்புகள் தடுக்கப்படுகின்றன. கிராம புறங்களில் உள்ள மண்சாலைகள் ஜல்லிசாலைகளாக மாற்றிஅமைக்கப்பட்டு வருகிறது. அரசு நடுநிலை, தொடக்கப்பள்ளிகளில் சுற்றுச்சுவரும்கட்டப்பட்டு இந்த பணிகளில் 100 நாள் வேலை திட்ட தொழிலாளர்கள் பயன்படுத்தப்பட்டு வருகிறார்கள். இந்த பணிகளை 14 வட்டார வளர்ச்சி அதிகாரிகள், 200 ஒன்றிய பொறியாளர்கள் கண்காணித்து வருகிறார்கள்.

மேலும் நிலத்தடி நீரை சேமிக்கும் வகையில் பண்ணைக்குட்டைகளும் அமைக்கப்பட்டு வருகின்றன. சிறு, குறு விவசாயிகளுக்கு அவர்களது இடங்களில் இந்த பண்ணைக்குட்டைகள் அமைக்கப்பட்டு வருகின்றன. கிராமப்புறங்களில் உள்ள பாசன வாய்க்கால்கள், ஆறுகளில் நிலத்தடி நீரை சேமிக்கும் வகையில் தடுப்பணைகளும் அமைக்கப்பட்டு வருகின்றன. இந்த பணிகளை கண்காணிக்க 7 வகையான பதிவேடுகளும் பராமரிக்கப்பட்டு வருகின்றன. இந்த பணிகள் தொடங்கி முடியும் போது புகைப்படங்களை எடுத்து வைப்பதோடு, இதனை ஆன்லைன் மூலம் பார்க்கும் வகையிலும் செயல்படுத்தப்பட்டு வருவதாக ஊரக வளர்ச்சி முகமை திட்ட இயக்குனர் மந்திராசலம் தெரிவித்தார்.