பெரிய குரும்பபட்டியில் ஜல்லிக்கட்டு: காளைகள் முட்டியதில் 13 பேர் காயம்

அன்னவாசல்,

புதுக்கோட்டை மாவட்டம் இலுப்பூர் அருகே உள்ள பெரிய குரும்பபட்டியில் உள்ள காயம்பு அய்யனார்கோவில் திருவிழாவையொட்டி நேற்று ஜல்லிக்கட்டு நடத்தப்பட்டது. இதற்காக கொண்டு வரப்பட்ட காளைகளை, கால்நடை மருத்துவக்குழுவினர் பரிசோதனை செய்து அனுமதி வழங்கினர். ஜல்லிக்கட்டை சுகாதாரத்துறை அமைச்சர் டாக்டர் சி.விஜயபாஸ்கர், கலெக்டர் கணேஷ் ஆகியோர் கொடியசைத்து தொடங்கி வைத்தனர்.

முதலில் கோவில் காளைகள் அவிழ்த்து விடப்பட்டன. இதனை யாரும் பிடிக்கவில்லை. தொடர்ந்து புதுக்கோட்டை, திண்டுக்கல், மதுரை, சிவகங்கை, கரூர் உள்பட பல்வேறு பகுதிகளில் இருந்து கொண்டு வரப்பட்ட 983 காளைகள் வாடிவாசல் வழியாக ஒவ்வொன்றாக அவிழ்த்து விடப்பட்டன. இதில் சீறிப்பாய்ந்து வந்த காளைகளை 275 மாடுபிடி வீரர்கள் அடக்கினர். இதில் சில காளைகள் மாடுபிடி வீரர்களிடம் சிக்கின. சில காளைகள் மாடுபிடி வீரர்களை கொம்பால் குத்தி பந்தாடின.

இதில் காளைகள் முட்டித்தள்ளியதில் மாடுபிடி வீரர்கள் சரத்குமார், ரெங்கராஜ், நவீன்குமார், சங்கர், பார்வையாளர்கள் மாரிமுத்து, ராமு, முத்தையா உள்பட 13 பேர் காயமடைந்தனர். அவர்களுக்கு மருத்துவக்குழுவினர் முதலுதவி சிகிச்சை அளித்தனர். இதில் 5 பேர் மேல்சிகிச்சைக்காக இலுப்பூர் அரசு மருத்துவமனை மற்றும் புதுக்கோட்டை அரசு மருத்துவக்கல்லூரி மருத்துவமனைகளுக்கு அனுப்பி வைக்கப்பட்டனர்.

காளைகளை அடக்கிய வீரர்களுக்கும், பிடிபடாத காளைகளின் உரிமையாளர்களுக்கும் வெள்ளி நாணயம், சைக்கிள், மின்விசிறி, குக்கர், அரிசி மூட்டைகள் உள்ளிட்ட பல்வேறு பரிசு பொருட்கள் வழங்கப்பட்டன.

ஜல்லிக்கட்டில் சிறப்பு விருந்தினராக நடிகர் விவேக் கலந்து கொண்டு போட்டியை கண்டுகளித்தார். இதில் மாவட்ட வருவாய் அதிகாரி ராமசாமி, இலுப்பூர் வருவாய் கோட்டாட்சியர் ஜெயபாரதி, தாசில்தார் சோனைகருப்பையா மற்றும் திரளான பொதுமக்கள் பார்த்து ரசித்தனர். புதுக்கோட்டை மாவட்ட போலீஸ் சூப்பிரண்டு செல்வராஜ், கூடுதல் போலீஸ் சூப்பிரண்டு இளங்கோவன், துணை போலீஸ் சூப்பிரண்டு கோபாலசந்திரன் தலைமையில், ஏராளமான போலீசார் பாதுகாப்பு பணியில் ஈடுபட்டனர்.