வாலிபரை கத்தியால் குத்திய வழக்கில் 4 பேர் கைது

திருப்பூர்,

திருப்பூர் காலேஜ் ரோடு ஸ்ரீவித்யா நகரை சேர்ந்தவர் கிருபாகரன்(வயது 22). சம்பவத்தன்று இரவு இவர் தனது நண்பர்களுடன் காலேஜ் ரோட்டில் உள்ள டாஸ்மாக் கடைக்கு சென்றதாக கூறப்படுகிறது. அப்போது அங்கிருந்த சாமுண்டிபுரத்தை சேர்ந்த சுதன்(26) என்பவருக்கும், கிருபாகரனுக்கும் தகராறு ஏற்பட்டுள்ளது. பின்னர் கிருபாகரன் அங்கிருந்து தனது காரில் நண்பர்களுடன் சென்றுள்ளார்.

இதைத்தொடர்ந்து சுதன் தனது நண்பர்கள் 4 பேருடன் சேர்ந்து இருசக்கர வாகனங்களில் சென்று கிருபாகரனின் காரை மறித்து அவரை அரிவாளை காட்டி கொலைமிரட்டல் விடுத்ததாக தெரி கிறது. அதன்பிறகு அடுத்த நாள் காலை மாஸ்கோ நகரில் கிருபாகரன் நின்றபோது அங்கு சுதன் தனது நண்பர்கள் 4 பேருடன் வந்துள்ளார்.

4 பேர் கைது

மீண்டும் அவர்களுக்குள் தகராறு ஏற்பட்டுள்ளது. அப்போது சுதன் தரப்பினர் கிருபாகரனை கத்தியால் குத்தி கொலைமிரட்டல் விடுத்ததாக தெரிகிறது. இதில் அவருக்கு இடது கையில் காயம் ஏற்பட்டது. உடனடியாக அருகில் இருந்தவர்கள் கிருபாகரனை மீட்டு திருப்பூர் அரசு ஆஸ்பத்திரிக்கு அனுப்பி வைத்தனர். அங்கு அவருக்கு சிகிச்சை அளிக்கப்பட்டு வருகிறது.

இதுகுறித்து திருப்பூர் வடக்கு போலீஸ் இன்ஸ்பெக்டர் பிச்சையா, சப்-இன்ஸ்பெக்டர் மனோகரன் ஆகியோர் சுதன், அவருடைய நண்பர்களான மாஸ்கோ நகரை சேர்ந்த பிரவீன்(27), விஜி(27), கல்லம்பாளையத்தை சேர்ந்த குட்டி(28), சின்ராசு ஆகியோர் மீது வழக்குப்பதிவு செய்து விசாரணை நடத்தி வந்தனர். இந்த நிலையில் நேற்று சுதன், பிரவீன், குட்டி, விஜி ஆகிய 4 பேரை போலீசார் கைது செய்தனர். சின்ராசுவை தேடி வருகிறார்கள்.