குடிநீர் கேட்டு பொதுமக்கள் சாலைமறியல்

ஓமலூர்,

ஓமலூரை அடுத்த தாத்தியம்பட்டியில் 200-க்கும் மேற்பட்ட குடும்பத்தினர் வசித்து வருகின்றனர். இந்த பகுதிக்கு வாரம் இரண்டு முறை மட்டுமே மேட்டூர் குடிநீர் வழங்கப்பட்டது. இந்தநிலையில் கடந்த ஒருமாதத்துக்கு முன்பு காமலாபுரம் பிரிவு ரோடு முதல் சின்னதிருப்பதி செல்லும் தார்சாலை விரிவாக்கத்தின் போது பொக்லைன் எந்திரம் கொண்டு ரோட்டை அகலப்படுத்தும்போது குடிநீர் குழாய் உடைந்துவிட்டது. இதை சீரமைத்து குடிநீர் பிரச்சினையை தீர்க்கும்படி பொதுமக்கள் பலமுறை ஓமலூர் ஒன்றிய அலுவலகத்தில் புகார் செய்தும் எவ்வித நடவடிக்கையும் எடுக்கப்பட வில்லை.

இதனால் ஆத்திரமடைந்த பொதுமக்கள் குடிநீர் கேட்டு தாத்தியம்பட்டி பஸ் நிறுத்தம் அருகே சாலைமறியலில் ஈடுபட்டனர்.

இதனால் அந்த பகுதியில் போக்குவரத்து பாதிக்கப்பட்டது. இதுபற்றி தகவல் அறிந்ததும் ஓமலூர் போலீசார் சம்பவ இடத்திற்கு சென்று பொதுமக்களுடன் பேச்சுவார்த்தை நடத்தினர். அப்போது குடிநீர் கிடைக்க நடவடிக்கை எடுப்பதாகவும், உடனடியாக டிராக்டர் மூலம் குடிநீர் வினியோகம் செய்ய நடவடிக்கை எடுக்கப்படும் என்றும் போலீசார் உறுதியளித்தனர். அதன்பேரில் பொதுமக்கள் அங்கிருந்து கலைந்து சென்றனர்.