மாவட்ட செய்திகள்

மேற்கு தொடர்ச்சி மலைப்பகுதியில் கனமழை: கொடுமுடியாறு அணை நிரம்பியது + "||" + Western Ghats Mountain Range: Kutumudiyirai dam is full

மேற்கு தொடர்ச்சி மலைப்பகுதியில் கனமழை: கொடுமுடியாறு அணை நிரம்பியது

மேற்கு தொடர்ச்சி மலைப்பகுதியில் கனமழை: கொடுமுடியாறு அணை நிரம்பியது
மேற்கு தொடர்ச்சி மலைப்பகுதியில் பெய்து வரும் கனமழையின் காரணமாக கொடுமுடியாறு அணை நிரம்பியது.
ஏர்வாடி

நெல்லை மாவட்டம் மேற்கு தொடர்ச்சி மலைப்பகுதியில் தொடர்ந்து கனமழை பெய்து வருகிறது. இதனால் அணைகளுக்கு நீர்வரத்து அதிகரித்து உள்ளது. இதன் காரணமாக நேற்று முன்தினம் சேர்வலாறு அணை நீர்மட்டம் ஒரே நாளில் 46 அடியும், பாபநாசம் அணையின் நீர்மட்டம் 8 அடியும் உயர்ந்தது. நீர்வரத்து தொடர்ந்து அதிகரித்து வருவதால் நேற்றும் இந்த அணைகளின் நீர்மட்டம் உயர்ந்தது.

அதாவது, நேற்று முன்தினம் 50.70 அடியாக இருந்த பாபநாசம் அணையின் நீர்மட்டம் நேற்று காலை 61.15 அடியாக உயர்ந்தது. ஒரே நாளில் 11 அடி உயர்ந்துள்ளது. இதுபோல் 65.29 அடியாக இருந்த சேர்வலாறு அணையின் நீர்மட்டம் நேற்று காலை 26 அடி உயர்ந்து 91.53 அடியாக இருந்தது. 76 அடியாக இருந்த மணிமுத்தாறு அணையின் நீர்மட்டம் நேற்று 81.10 அடியாக உயர்ந்தது.

ஏர்வாடி அருகே திருக்குறுங்குடியில் உள்ள கொடுமுடியாறு அணை நீர்மட்டம் நேற்று முன்தினம் 32 அடியாக இருந்தது.

மேற்கு தொடர்ச்சி மலைப்பகுதியில் பெய்து வரும் தொடர் மழையால் கொடுமுடியாறு அணை நேற்று நிரம்பியது. அணையின் முழு கொள்ளளவான 52.50 அடி நீர்மட்டத்தை எட்டியது.

இந்த அணை ஏற்கனவே கடந்த டிசம்பர் மாதம் நிரம்பியது. தற்போது 6 மாத இடைவெளியில் மீண்டும் அதன் முழு கொள்ளளவை எட்டியுள்ளது. கடந்த 8 ஆண்டுகளுக்கு பிறகு ஜூன் மாதத்தில் கொடிமுடியாறு அணை தற்போது முழு கொள்ளளவை எட்டியதாக பொதுப்பணித்துறையினர் தெரிவித்தனர்.

இந்த அணையின் மூலம் 44 குளங்களுக்கு தண்ணீர் செல்கிறது. ஏராளமான கிராமங்களுக்கு குடிநீர் ஆதாரமாகவும் விளங்குகிறது. அணை நிரம்பி உள்ளதால், அணைக்கு வரும் 1,000 கன அடி தண்ணீரும் அப்படியே கால்வாய்களில் திறந்து விடப்படுகின்றன. வள்ளியூரான் கால்வாயில் 900 கன அடி தண்ணீரும், படலையார்குளம் கால்வாய் மற்றும் ஆற்றுப்பாசனத்துக்கு 100 கன அடி தண்ணீரும் திறந்து விடப்படுகிறது.

மேலும் கடனாநதி, ராமநதி, கருப்பாநதி, அடவிநயினார் உள்ளிட்ட அணைகளின் நீர்மட்டமும் கணிசமாக உயர்ந்துள்ளது.

இதற்கிடையே, பாபநாசம் அணையில் இருந்து தண்ணீர் திறப்பு நேற்று வினாடிக்கு 20 கன அடியாக குறைக்கப்பட்டது. சேர்வலாறு அணை முழுமையாக மூடப்பட்டது.

பாபநாசம் கீழ் அணையில் இருந்து நேற்று முன்தினம் ஒருங்கிணைந்த அளவாக வினாடிக்கு 900 கன அடிக்கு மேல் தண்ணீர் திறந்து விடப்பட்டது. ஆனால் நேற்று 77 கன அடி தண்ணீர் மட்டுமே வெளியேறியது. மலைப்பகுதியில் பெய்து வரும் தொடர் மழையால் காட்டாற்று வெள்ளம் தாமிரபரணி ஆற்றில் கலந்து தண்ணீர் வரத்து தொடர்ந்து அதிகரித்து வருகிறது.

நெல்லை மாவட்டத்தில் அணைகளின் நீர்மட்டம் தொடர்ந்து அதிகரித்து வருவதால் விவசாயிகள் பெரும் மகிழ்ச்சி அடைந்துள்ளனர்.

நேற்று காலை 8 மணியுடன் முடிவடைந்த 24 மணி நேரத்தில் பெய்த மழை அளவு விவரம் மில்லிமீட்டரில் வருமாறு:-

பாபநாசம்- 118, கொடுமுடியாறு- 100, சேர்வலாறு -46, கருப்பாநதி- 75, குண்டாறு- 49, கடனாநதி- 18, ராமநதி- 12, அடவிநயினார்- 30, மணிமுத்தாறு- 6.40, செங்கோட்டை- 38, ராதாபுரம்- 13, தென்காசி- 20.


தொடர்புடைய செய்திகள்

1. பொய்கை அணையில் விரிசல் தளவாய்சுந்தரம் பார்வையிட்டார்
ஆரல்வாய்மொழி அருகே பொய்கை அணையில் விரிசல் ஏற்பட்டுள்ள இடத்தை தளவாய்சுந்தரம் பார்வையிட்டார்.
2. கொள்ளிடம் அணையில் சீரமைப்பு பணி: ஆற்றில் தண்ணீர் வீணாக செல்வது இன்று முழுமையாக தடுக்கப்படும்
கொள்ளிடம் அணையில் இருந்து மதகுகள் உடைந்த பகுதி வழியாக ஆற்றில் தண்ணீர் வீணாக செல்வது இன்று (வியாழக்கிழமை) முழுமையாக தடுக்கப்படும். மேலும் பாறாங்கற்கள் மூலம் தடுப்புகள் அமைப்பது நிறைவடைகிறது.
3. கொள்ளிடம் அணைக்கு நீர்வரத்து குறைந்தது: மதகுகள் உடைந்த பகுதியில் தடுப்பு ஏற்படுத்தும் பணி இறுதிகட்டத்தை எட்டியது
கொள்ளிடம் அணைக்கு நீர்வரத்து குறைந்துள்ளது. மதகுகள் உடைந்த பகுதியில் தடுப்பு ஏற்படுத்தும் பணி இறுதிகட்டத்தை எட்டியுள்ளது.
4. கொள்ளிடம் அணையில் உடைந்த மதகுகள் சீரமைப்பு: தண்ணீர் வரத்து அதிகரிப்பால் மணல் மூட்டைகளை அடுக்கும் பணி பாதிப்பு
திருச்சி முக்கொம்பு கொள்ளிடம் அணையில் மதகுகள் உடைந்த பகுதியில், தண்ணீர் வரத்து அதிகரிப்பால் மணல் மூட்டைகளை அடுக்கும் பணியில் பாதிப்பு ஏற்பட்டுள்ளது. பாறாங்கற்களை கொண்டு அடைப்புகள் ஏற்படுத்தும் முயற்சி தீவிரமாக நடந்து வருகிறது.
5. தண்ணீரின் வேகத்தை கட்டுப்படுத்தி முக்கொம்பு கொள்ளிடம் அணையை சீரமைக்க முடியாமல் அதிகாரிகள் திணறல்
தண்ணீரின் வேகத்தை கட்டுப்படுத்தி, முக்கொம்பு கொள்ளிடம் அணையை சீரமைக்க முடியாமல் அதிகாரிகள் திணறி வருகிறார்கள். அங்கு பொதுப்பணித்துறை முதன்மை செயலாளர் பிரபாகர் படகு மூலம் சென்று ஆய்வு செய்தார்.