பாளையங்கோட்டையில் பெண் போலீஸ் பணிக்கான உடல் திறன் தேர்வு

நெல்லை,

பாளையங்கோட்டையில் பெண் போலீஸ் பணிக்கான உடல் திறன் தேர்வு நேற்று நடைபெற்றது.

தமிழ்நாடு சீருடை பணியாளர் தேர்வாணையம் மூலம் 2–ம் நிலை போலீசார் பணிக்கான எழுத்து தேர்வு கடந்த மார்ச் மாதம் நடைபெற்றது. இதில் தேர்ச்சி பெற்றவர்களுக்கு உடல் திறன் தேர்வு 6 நாட்கள் நடைபெறுகிறது. நெல்லை மாவட்டத்தில் 2,003 ஆண்களும், 805 பெண்களும் எழுத்து தேர்வில் தேர்ச்சி பெற்றுள்ளனர்.

அவர்களுக்கு உடல் திறன் தேர்வு, பாளையங்கோட்டையில் உள்ள ஆயுதப்படை மைதானத்தில் கடந்த 2–ந் தேதி தொடங்கி நடைபெற்று வருகிறது. 2, 3–ந் தேதிகளில் ஆண்களுக்கான உடல் தகுதி தேர்வு நடைபெற்றது.

3–வது நாளான நேற்று பெண்களுக்கான உடல் திறன் தேர்வு நடந்தது. இதில் பங்கேற்க நெல்லை மாவட்டத்தில் எழுத்து தேர்வில் தேர்ச்சி பெற்ற 805 பெண்களுக்கு அழைப்பு விடுக்கப்பட்டு இருந்தது. ஆனால் இதில் 528 பேர் மட்டுமே கலந்து கொண்டனர்.

அவர்களுக்கு சான்றிதழ் சரிபார்ப்பு, உயரம், எடை ஆகியவை அளவீடு செய்யப்பட்டன. பின்னர் 400 மீட்டர் ஓட்டத்திறன் தேர்வு நடத்தப்பட்டது.

இந்த தேர்வு பணியை சென்னை போலீஸ் பயிற்சி அகாடமி ஐ.ஜி. பாஸ்கரன், சீருடை பணியாளர் தேவ்வாணைய போலீஸ் சூப்பிரண்டு ரூபேஸ்குமார் மீனா, நெல்லை மாவட்ட போலீஸ் சூப்பிரண்டு அருண்சக்திகுமார் ஆகியோர் நேரடியாக கண்காணித்தனர்.

3 நாட்கள் நடைபெற்ற உடல் தகுதி தேர்வில், தேர்ச்சி பெற்றவர்களுக்கு அடுத்தகட்ட உடல் திறன் தேர்வுகள் இன்று தொடங்கி 3 நாட்கள் நடைபெறுகின்றன. இதில் கயிறு ஏறுதல், நீளம் தாண்டுதல், குண்டு எறிதல் போன்ற தேர்வுகள் நடத்தப்பட உள்ளது. இந்த தேர்வில் வெற்றி பெறுகிறவர்களுக்கு மருத்துவ பரிசோதனை செய்யப்படுகிறது.