அமைதி பள்ளத்தாக்கு அருகே ரூ.1 கோடி மதிப்புள்ள கஞ்சா செடிகள் அழிப்பு

கொழிஞ்சாம்பாறை,

பாலக்காடு மாவட்டம் அட்டப்பாடி அகளி உதவி போலீஸ் சூப்பிரண்டு சுஜித்தாஸ். இவருடைய தலைமையில் ஏராளமான போலீசார் நேற்று அமைதி பள்ளத்தாக்கு பகுதியில் மாவோயிஸ்டுகளை தேடும் பணியில் ஈடுபட்டு இருந்தனர். அப்போது அமைதி பள்ளத்தாக்கில் இருந்து 4 கிலோ மீட்டர் தொலைவில் பஞ்சகமலை அடிவாரத்தை அடைந்தனர்.

இந்த மலையடிவாரத்தில் கஞ்சா செடிகள் பயிரிடப்பட்டு இருப்பது தெரிய வந்தது. சுமார் ஒரு ஏக்கரில் இந்த செடிகள் பயிரிடப்பட்டு இருந்தது. இதனால் அதிர்ச்சி அடைந்த போலீசார் கஞ்சா செடிகள் வெட்டி தீ வைத்து அழித்தனர்.

6 மாத வளர்ச்சியில் இருந்த 820 செடிகளும் தீ வைத்து அழிக்கப்பட்டன. இதன் மதிப்பு ரூ.1 கோடி என்று கூறப்படுகிறது. இந்த செடிகளை வளர்த்தது யார்? என்று தெரியவில்லை. எனவே கஞ்சா செடிகள் பயிரிடப்பட்டு இருந்த இடம் யாருக்கு சொந்தமானது? என்பது குறித்து போலீசார் விசாரணை நடத்தி வருகிறார்கள்.