கர்நாடக ஐகோர்ட்டுக்கு, புதிதாக நியமிக்கப்பட்ட கூடுதல் நீதிபதிகள் உள்பட 12 பேர் பதவி ஏற்பு

பெங்களூரு,

கர்நாடக ஐகோர்ட்டில் தற்போது 24 நீதிபதிகள் உள்ளனர். மேலும் 38 நீதிபதிகளின் பணி இடங்கள் காலியாக இருந்தன. இந்த நிலையில், கர்நாடக ஐகோர்ட்டுக்கு கூடுதலாக 5 நீதிபதிகளை நியமித்து மத்திய அரசு உத்தர விட்டது. அதாவது புதிய கூடுதல் நீதிபதிகளாக மூத்த வக்கீல்கள் அசோக் கோலப்பா நிஜகனவர், ஹெதூர் புட்டசாமிகவுடா சந்தேஷ், கிருஷ்ணன் நடராஜன், பிரலத்ராவ் கோவிந்தராவ் முத்தாலிக் பட்டீல், அப்பசாகேப் சாந்தப்பா பெல்லுன்கே ஆகிய 5 பேரும் நியமிக்கப்பட்டனர்.

அதே நேரத்தில் ஐகோர்ட்டில் கூடுதல் நீதிபதிகளாக பணியாற்றி வரும் கெம்பையா சோமசேகர், கொட்டரவா சோமப்பா முத்கல், சீனிவாஸ் ஹரீஷ்குமார், ஜான் மைக்கேல் குன்கா, பசவராஜ் அன்டனகவுடா பட்டீல், நங்கிலி கிருஷ்ணராவ் சுதிந்திரராவ், ஒசூர் புஜன்கரயா பிரபாகர் சாஸ்திரி ஆகிய 7 பேரும் நிரந்தர நீதிபதிகளாக நியமிக்கப்பட்டார்கள்.

இந்த நிலையில், 5 கூடுதல் நீதிபதிகள் உள்பட 12 நீதிபதிகளின் பதவி ஏற்பு விழா நேற்று ராஜ்பவன் ரோட்டில் உள்ள கவர்னர் மாளிகையில் நடைபெற்றது. அப்போது 5 கூடுதல் நீதிபதிகள் மற்றும் 7 நிரந்தர நீதிபதிகளுக்கு கவர்னர் வஜூபாய் வாலா பதவிப்பிரமாணம் செய்து வைத்தார். பதவி ஏற்பு விழாவில் முதல்-மந்திரி குமாரசாமி கலந்து கொண்டார். பின்னர் புதிய நீதிபதிகளாக பதவி ஏற்ற 12 பேருக்கும், கவர்னர் வஜூபாய் வாலா மற்றும் முதல்-மந்திரி குமாரசாமி வாழ்த்து தெரிவித்தார்கள்.

கர்நாடக ஐகோர்ட்டுக்கு நிரந்தர நீதிபதியாக பதவி ஏற்றுள்ள ஜான் மைக்கேல் குன்கா, பெங்களூரு தனிக்கோர்ட்டில் தமிழக முதல்-அமைச்சராக இருந்த ஜெயலலிதா மீதான சொத்துகுவிப்பு வழக்கில், விசாரணை நீதிபதியாக பணியாற்றியவர் என்பது குறிப்பிடத்தக்கது. கர்நாடக ஐகோர்ட்டில் ஒட்டு மொத்தமாக 29 நீதிபதிகள் உள்ளனர். இன்னும் காலியாக உள்ள நீதிபதிகளின் பணி இடங்கள் விரைவில் நிரப்பப்படும் என்று தகவல்கள் வெளியாகி உள்ளன.