2 நாட்கள் விடுமுறைக்கு பிறகு கர்நாடக சட்டசபை மீண்டும் இன்று கூடுகிறது

பெங்களூரு,

கர்நாடக சட்டசபை குளிர்கால கூட்டத்தொடர் கடந்த 10-ந் தேதி பெலகாவி சுவர்ண சவுதாவில் கூடியது. இந்த கூட்டம் 5 நாட்கள் நடைபெற்றது. சனி, ஞாயிறு ஆகிய 2 நாட்கள் சட்டசபைக்கு விடுமுறை அளிக்கப்பட்டது. இந்த நிலையில் 2 நாட்கள் விடுமுறைக்கு பிறகு கர்நாடக சட்டசபை மீண்டும் இன்று(திங்கட் கிழமை) பெலகாவி சுவர்ண சுவுதாவில் கூடுகிறது.

இந்த கூட்டத்தொடர் வருகிற 21-ந் தேதி வரை நடக்கிறது. காங்கிரஸ் எம்.எல்.ஏ.க்கள் கூட்டம் நாளை(செவ்வாய்க்கிழமை) பெலகாவியில் சித்தராமையா தலைமையில் நடக்கிறது. சித்தராமையா ஆட்சியில் ரூ.35 ஆயிரம் கோடி ஊழல் நடந்துள்ளதாக பா.ஜனதா ஏற்கனவே குற்றம்சாட்டியது. அந்த பிரச்சினையை சட்ட சபையில் எழுப்ப பா.ஜனதா திட்டமிட்டுள்ளது.

முதல்-மந்திரி குமாரசாமி இன்று சட்டசபை கூட்டத்தில் பங்கேற்க மாட்டார் என்று அறிவிக்கப்பட்டுள்ளது. அவர் மத்தியபிரதேசம், ராஜஸ்தான் மாநில முதல்-மந்திரிகள் பதவி ஏற்பு விழாவில் கலந்து கொள்கிறார்.

இதற்காக குமாரசாமி இன்று காலை 7 மணிக்கு தனி விமானம் மூலம் போபால் செல்கிறார். அங்கு பதவி ஏற்பு விழாவில் கலந்து கொண்ட பிறகு, ராஜஸ்தானுக்கு செல்கிறார்.

இரு விழாக்களையும் முடித்துவிட்டு, அவர் மாலையில் பெங்களூரு திரும்புகிறார். கா்நாடக சட்டசபை கூட்டத்தில் நாளை(செவ்வாய்க் கிழமை) அவர் கலந்து கொள்கிறார்.