அரக்கோணம் அருகே மோட்டார் சைக்கிள்கள் மோதல்; வாலிபர் பலி 4 பேர் படுகாயம்

அரக்கோணம், 

அரக்கோணம் அருகே உள்ள நந்திவேடந்தாங்கல் காலனி, மாரியம்மன் கோவில் தெருவை சேர்ந்தவர் செல்வம். இவரது மகன் சிவா (வயது 28), குணசேகரன் மகன் மணிகண்டன் என்கிற அப்புன் (26), ராதாகிருஷ்ணன் (43). இவர்கள் 3 பேரும் நேற்று சென்னை, திருநின்றவூரில் கட்டிட வேலைக்கு சென்றுவிட்டு மாலையில் அரக்கோணம் வந்தனர்.

பின்னர் அவர்கள் ஒரே மோட்டார் சைக்கிளில் ஊருக்கு புறப்பட்டனர். அரக்கோணத்தை அடுத்த நேதாஜி நகர் மேம்பாலம் அருகே சென்ற போது, அரக்கோணம் அருகே உள்ள கோட்டக்கண்டிகை பகுதியை சேர்ந்த ராஜேந்திரன் என்பவரின் மகன் அண்ணாமலை (28), நரசிங்கபுரம் பகுதியை சேர்ந்த சதீஷ் (23) ஆகிய இருவரும் அரக்கோணம் நோக்கி மோட்டார் சைக்கிளில் வந்து கொண்டிருந்தனர். கண்ணிமைக்கும் நேரத்தில் 2 மோட்டார் சைக்கிள்களும் நேருக்கு நேர் மோதிக்கொண்டன.

இந்த விபத்தில் அண்ணாமலை சம்பவ இடத்திலேயே பரிதாபமாக உயிரிழந்தார். மேலும் சிவா, மணிகண்டன், ராதாகிருஷ்ணன், சதீஷ் ஆகிய 4 பேரும் படுகாயம் அடைந்தனர். அவர்களை அக்கம், பக்கத்தில் இருந்தவர்கள் மீட்டு சிகிச்சைக்காக அரக்கோணம் அரசு மருத்துவமனைக்கு அனுப்பி வைத்தனர்.

இதுகுறித்து தகவல் அறிந்ததும் அரக்கோணம் சரக துணை போலீஸ் சூப்பிரண்டு எஸ்.கே.துரைப்பாண்டியன், டவுன் போலீஸ் இன்ஸ்பெக்டர் முத்துராமலிங்கம், சப்-இன்ஸ்பெக்டர் பழனிசாமி ஆகியோர் சம்பவ இடத்துக்கு சென்று விசாரணை நடத்தினார்கள். இதுதொடர்பாக அரக்கோணம் டவுன் போலீசார் வழக்குப்பதிவு செய்து விசாரணை நடத்தி வருகின்றனர்.