வங்கியில் வாங்கிய கடனை திருப்பி செலுத்தாததால் தொழிலதிபரின் வணிக வளாகத்திற்கு ‘சீல்’ - அதிகாரிகளை தாக்க முயன்றதால் பரபரப்பு

அனுப்பர்பாளையம்,

திருப்பூர் 15 வேலம்பாளையத்தை அடுத்த சோளிபாளையத்தை சேர்ந்தவர் மாணிக்கம் (வயது 42). பனியன் நிட்டிங் நிறுவனம் வைத்துள்ளார். தொழில் அதிபரான இவர், அவினாசி ரோடு அனுப்பர்பாளையம்புதூர் சந்திப்பில் 2 தளங்கள் கொண்ட கட்டிடத்தில் 9 கடைகளை வாடகைக்கு விட்டுள்ளார். கடந்த 2012-ம் ஆண்டு மாணிக்கம் தொழில் அபிவிருத்திக்காக பஞ்சாப் நேஷனல் வங்கியின் திருப்பூர் பிரதான கிளையில் 4 சொத்துக்களின் பேரில் ரூ.6 கோடியே 75 லட்சம் கடன் பெற்றதாக தெரிகிறது.

மேலும் அந்த தொகையை குறித்த நேரத்தில் செலுத்தவில்லை என்று கூறப்படுகிறது. இதையடுத்து கடந்த 2017-ம் ஆண்டு அனுப்பர்பாளையம்புதூரில் உள்ள மாணிக்கத்திற்கு சொந்தமான கட்டிடத்தை சம்பந்தபட்ட வங்கி நிர்வாகம் ஏலம் விட்டது. இந்த நிலையில் நேற்று பஞ்சாப் நேஷனல் வங்கி அதிகாரிகள் மற்றும் பறிமுதல் குழுவினர் மாணிக்கத்திற்கு சொந்தமான கட்டிடத்தை ‘சீல்’ வைத்து ஜப்தி செய்வதற்காக சென்றனர். அவர்களுடன் திருப்பூர் வடக்கு தாசில்தார் ஜெயக்குமார் மற்றும் அனுப்பர்பாளையம் போலீஸ் இன்ஸ்பெக்டர் வேலு (பொறுப்பு) தலைமையில் போலீசார் ஆகியோர் உடன் சென்றனர்.

இதையடுத்து கீழ் தளத்தின் கடை உரிமையாளர்கள் அவசர அவசரமாக கடையில் இருந்த பொருட்களை காலி செய்தனர். அப்போது மாணிக்கம் வங்கி அதிகாரிகளிடம் கடன் தொகையை செலுத்த தயாராக இருப்பதாகவும், கட்டிடம் ஏலம் விட்டது தொடர்பான வழக்கு நிலுவையில் இருப்பதால், ஜப்தி செய்வதற்கான முறையான உத்தரவு வேண்டும் என்றும் கூறி உள்ளார். ஆனால் அதிகாரிகள் அதையும் மீறி அங்குள்ள 4 கடைகளுக்கு சீல் வைத்தனர். இதனால் மாணிக்கம், அவருடைய உறவினர்கள் மற்றும் கடையின் உரிமையாளர்கள் அதிகாரிகளிடம் கடும் வாக்குவாதத்தில் ஈடுபட்டனர். ஒருகட்டத்தில் அனைவரும் சேர்ந்து அதிகாரிகளை தாக்க முயன்றதால் பரபரப்பு ஏற்பட்டது.

உடனடியாக அங்கிருந்த போலீசார் அதிகாரிகளை பாதுகாப்புக்காக போலீஸ் வாகனம் மற்றும் காரில் ஏற்றி அங்கிருந்து அனுப்பி வைத்தனர். ஆனால் அங்கு நின்றவர்கள் காரை வழிமறித்து முற்றுகை போராட்டத்தில் ஈடுபட்டனர். இதன் காரணமாக அதிகாரிகள் கட்டிடத்திற்கு முழுமையாக ‘சீல்’ வைக்காமல் பாதியிலேயே அங்கிருந்து சென்றனர். இதன் பின்பு ஒருசிலர் 4 கடைகளை பூட்டி வைக்கப்பட்ட சீலை சுத்தியலால் உடைத்து அப்புறப்படுத்தினார்கள்.

இதுகுறித்து மாணிக்கம் கூறியதாவது, “வங்கியில் சொத்துக்களின் பேரில் வாங்கிய கடனை பாதி செலுத்தி விட்ட நிலையில் மீதமுள்ள தொகையையும் செலுத்துவதற்கும் தயாராக இருந்தேன். ஆனால் என்னுடைய கட்டிடத்தை வங்கி சார்பில் மிகக்குறைந்த விலைக்கு ஏலம் விட்டனர். இது தொடர்பாக வழக்கு நீதிமன்றத்தில் உள்ள நிலையில் கட்டிடத்தை ஜப்தி செய்வதற்கு முன்பு எந்த முன்னறிவிப்பும் செய்யவில்லை. இதேபோல் ஜப்தி செய்வதற்கான எந்த உத்தரவையும் அதிகாரிகள் கொண்டு வரவில்லை என்றார்.

இதுகுறித்து திருப்பூர் வடக்கு தாசில்தார் ஜெயக்குமார் கூறும்போது “ சம்பந்தப்பட்ட கட்டிடத்தை ஜப்தி செய்து ‘சீல்’ வைப்பதற்கான சப்-கலெக்டரின் உத்தரவின் பேரிலேயே வங்கி அதிகாரிகள் முறையாக அங்கு சென்றனர். கட்டிடத்திற்கு ‘சீல்’ வைக்க விடாமல் தடுத்து வாக்குவாதத்தில் ஈடுபட்டதால் வங்கி அதிகாரிகள் பாதியிலேயே சென்று விட்டனர்” என்றார்.