வேலூர் அருகே நின்று கொண்டிருந்த லாரி மீது பஸ் மோதி பெண் பலி 11 பேர் படுகாயம்

வேலூர், 

ஓசூரில் இருந்து நேற்று முன்தினம் நள்ளிரவில் 12 மணியளவில் அரசு பஸ் ஒன்று வேலூருக்கு புறப்பட்டது. இதில் 30–க்கும் மேற்பட்ட பயணிகள் இருந்தனர். பஸ்சை டிரைவர் ஆனந்தன்ராம் என்பவர் ஓட்டி வந்தார். நேற்று அதிகாலையில் பஸ் வேலூரை அடுத்த மேல்மொணவூர் அருகே வந்துகொண்டிருந்தது.

அதிகாலை நேரம் என்பதால் பஸ்சில் இருந்த பயணிகள் அனைவரும் ஆழ்ந்த தூக்கத்தில் இருந்தனர். அங்குள்ள கோ–ஆப்டெக்ஸ் குடோன் அருகில் வந்தபோது, ரோட்டின் ஓரத்தில் லாரி ஒன்று நின்று கொண்டிருந்தது. கண் இமைக்கும் நேரத்தில் நின்று கொண்டிருந்த லாரியின் பின்பக்கத்தில் அரசு பஸ் மோதியது.

இதில் பஸ்சின் முன்பகுதி நொறுங்கியது. இதனால் பஸ்சில் இருந்த பயணிகள் கூச்சலிட்டனர். இதை பார்த்ததும் அங்கிருந்தவர்கள் சென்று மீட்பு பணியில் ஈடுபட்டனர். விரிஞ்சிபுரம் போலீசுக்கும் தகவல் தெரிவிக்கப்பட்டது. தகவல் அறிந்ததும் போலீசாரும் விரைந்து சென்று விபத்தில் சிக்கியவர்களை மீட்டனர்.

இந்த விபத்தில் ஓசூரை சேர்ந்த சவுந்தரவல்லி (வயது 55) என்பவர் சம்பவ இடத்திலேயே பலியானார். 11 பேர் படுகாயமடைந்தனர். அவர்கள் 108 ஆம்புலன்ஸ் மூலம் அடுக்கம்பாறை அரசு மருத்துவமனைக்கு அனுப்பி வைக்கப்பட்டனர். அவர்களுக்கு அங்கு சிகிச்சை அளிக்கப்பட்டு வருகிறது.

இந்த விபத்து குறித்து விரிஞ்சிபுரம் போலீசார் வழக்குப்பதிவு செய்து விசாரணை நடத்தி வருகின்றனர்.