காணும் பொங்கல் பண்டிகையன்று ரூ.8 கோடிக்கு மது விற்பனை

சேலம்,

சேலம் மாவட்டத்தில் 204 டாஸ்மாக் கடைகள் செயல்பட்டு வருகின்றன. இவற்றில் 54 கடைகளில் மட்டுமே பார் வசதி உள்ளன. மாவட்டத்தில் வழக்கமான நாட்களில் சுமார் ரூ.4 கோடி வரை மது விற்பனை செய்யப்படுவதாக கூறப்படுகிறது. ஆனால் புத்தாண்டு, தீபாவளி, பொங்கல், திருவிழா என முக்கிய பண்டிகை நாட்களில் டாஸ்மாக் கடைகளில் கூடுதலாக மது விற்பனை நடைபெறுவது வழக்கம்.

பொங்கல் பண்டிகையையொட்டி மாவட்டத்தில் உள்ள டாஸ்மாக் கடைகளில் மது விற்பனை அமோகமாக இருந்தது. இதனால் முன்னதாகவே அனைத்து டாஸ்மாக் கடைகளிலும் கூடுதலாக மது பாட்டில்கள் அனுப்பி வைத்து இருப்பு வைக்கப்பட்டன. நேற்று முன்தினம் காணும் பொங்கல் பண்டிகையன்று மது விற்பனை அதிகமாக இருந்தது.

இதுகுறித்து மாவட்ட டாஸ்மாக் மேலாளர் முத்துராமலிங்கம் கூறியதாவது:-

இந்த ஆண்டு பொங்கல் பண்டிகையையொட்டி அனைத்து டாஸ்மாக் கடைகளிலும் மது விற்பனை கடந்த ஆண்டை விட அதிகமாகவே இருந்தது. நேற்று முன்தினம் காணும் பொங்கல் பண்டிகையன்று மட்டும் மாவட்டத்தில் ரூ.8 கோடியே 50 லட்சத்து 61 ஆயிரத்து 385-க்கு மது விற்பனை செய்யப்பட்டது. இதில் 9,515 பீர் பெட்டிகளும், 13,284 பிராந்தி உள்ளிட்ட மது பெட்டிகளும் விற்பனை ஆனது.

பீர் விற்பனை கடந்த ஆண்டு காணும் பொங்கலை விட 30 சதவீதம் அதிகரித்துள்ளது. பொங்கல் பண்டிகையையொட்டி மாவட்டத்தில் 3 நாட்களில் ரூ.24 கோடியே 74 லட்சத்து 86 ஆயிரத்து 17-க்கு மது விற்பனை செய்யப்பட்டுள்ளது. இவ்வாறு அவர் கூறினார்.