எம்.ஜி.ஆர். உருவாக்கிய இயக்கத்தை யாராலும் அழிக்க முடியாது அமைச்சர் சி.வி.சண்முகம் பேச்சு

விழுப்புரம்,

விழுப்புரம் சட்டமன்ற தொகுதி அ.தி.மு.க. சார்பில் எம்.ஜி.ஆர். பிறந்த நாள் விழா பொதுக்கூட்டம் விழுப்புரம் மந்தக்கரை திடலில் நடைபெற்றது. கூட்டத்தில் வடக்கு மாவட்ட செயலாளரும், சட்டத்துறை அமைச்சருமான சி.வி.சண்முகம், மாநில அமைப்பு செயலாளர் டாக்டர் லட்சுமணன் எம்.பி., தலைமை கழக பேச்சாளர் சிட்கோ சீனு ஆகியோர் கலந்துகொண்டு சிறப்புரையாற்றினர். கூட்டத்தில் அமைச்சர் சி.வி.சண்முகம் பேசியதாவது:–

எம்.ஜி.ஆர். உயிரோடு இருக்கின்ற வரையில் தி.மு.க. தலைவர் கருணாநிதியால் கோட்டைவாசலை மிதிக்க முடியவில்லை. அ.தி.மு.க. பிளவுபட்டதால் தி.மு.க. ஆட்சிக்கு வந்தது. அதன்பிறகு ஜெயலலிதா கட்சியை ஒன்றிணைத்து ஆட்சியை பிடித்தார். எம்.ஜி.ஆர். உருவாக்கிய, ஜெயலலிதாவால் வளர்க்கப்பட்ட இந்த இயக்கத்தை யாராலும் அழிக்கவும் முடியாது, அசைக்கவும் முடியாது.

மத்திய அரசை எதிர்த்து குரல் கொடுக்கவில்லை என்று எதிர்க்கட்சி தலைவர் மு.க.ஸ்டாலின் கூறுகின்றார். காவிரி, முல்லைப்பெரியாறு தற்போதையை மேகதாது வரை எதிர்த்து குரல் கொடுப்பது அ.தி.மு.க. மட்டுமே. அதேபோல் ராஜீவ்காந்தி கொலையாளிகள் 7 பேரை விடுதலை செய்ய வேண்டி சட்டசபையில் தீர்மானம் நிறைவேற்றியது அ.தி.மு.க. தான்.

எந்த சூழ்நிலையிலும் மத்திய அரசை எதிர்த்து தி.மு.க. குரல் கொடுத்ததும் இல்லை, தீர்மானம் நிறைவேற்றியதும் கிடையாது. எப்படியாவது இந்த ஆட்சியை கவிழ்க்கலாம் என்று திட்டம் தீட்டுகிறார்கள். தற்போது முதல்–அமைச்சர் மீதே புகார் கூறுகிறார்கள். அண்ணா நகர் ரமேஷ், சாதிக்பாஷா மரணம் குறித்து மு.க.ஸ்டாலின் எப்போதாவது பேசியுள்ளாரா?, புதியதாக தலைமை செயலகம் கட்டியதில் ஊழல் நடைபெற்றுள்ளது என்று வழக்கு போட்டால் உடனடியாக அதற்கு தி.மு.க., கோர்ட்டில் தடை வாங்குகிறது. அதே நேரத்தில் அ.தி.மு.க. கொண்டு வரும் அனைத்து நல்ல திட்டங்களையும் எதிர்த்து தி.மு.க., கோர்ட்டில் வழக்கு தொடர்கிறது. அத்தனை வழக்குகளிலும் வெற்றி பெற்று மக்களுக்கு நல்ல முறையில் நலத்திட்ட உதவிகளை செய்து வருகின்றோம்.

எதற்கு எடுத்தாலும் அனைத்து அமைச்சர்களும் சிறை செல்வார்கள் என்று மு.க.ஸ்டாலின் கூறி வருகிறார். ஊழல் வழக்குகளை விசாரிப்பதற்காக சிறப்பு தனி நீதிமன்றம் அமைக்கப்பட்டுள்ளது. தற்போது தி.மு.க.வில் எம்.எல்.ஏ.க்களாக உள்ள 22 பேர் மீது நிலஅபகரிப்பு உள்பட ஊழல் வழக்குகள் நடைபெற்று வருகின்றன. விரைவில் தீர்ப்பு வரும், அப்போது யார் சிறைக்கு செல்வார்கள் என்று தெரியும்.

விழுப்புரம் மாவட்டத்தை இரண்டாக பிரித்து, கள்ளக்குறிச்சியை தலைமையிடமாக கொண்டு தனி மாவட்டத்தை உருவாக்கியது நல்லதுதான். அப்போதுதான் இன்னும் சிறந்த நிர்வாகத்தை மக்களுக்கு தர முடியும். விழுப்புரம் மாவட்டத்தில் குடிநீர் பிரச்சினை இருக்கிறது, அதனை போக்குகின்ற வகையில் கொள்ளிடம்– விழுப்புரம் கூட்டு குடிநீர் திட்டத்திற்கு வருகிற நிதிநிலை அறிக்கையில் நிதி ஒதுக்க முதல்–அமைச்சரிடம் வலியுறுத்தப்படும்.

இவ்வாறு அவர் பேசினார்.