திருச்செந்தூர் அருகே கிணற்றில் தவறி விழுந்து மாணவன் சாவு பள்ளியிலிருந்து மதிய உணவு சாப்பிட காப்பகத்துக்கு சென்றபோது பரிதாபம்

திருச்செந்தூர்,

தூத்துக்குடியை அடுத்த முத்தையாபுரத்தைச் சேர்ந்தவர் மாரிமுத்து. இவருடைய மனைவி புஷ்பலதா (வயது 32). இவர்களுக்கு வேல்முருகன் (8), சந்தனகுமார் (6) ஆகிய 2 மகன்கள். மாரிமுத்து கடந்த 3 மாதங்களுக்கு முன்பு இறந்து விட்டார்.

இதனால் புஷ்பலதா தன்னுடைய 2 மகன்களையும் திருச்செந்தூர் அருகே அடைக்கலாபுரத்தில் உள்ள தனியார் காப்பகத்தில் சேர்த்தார். அந்த காப்பகத்துக்கு சொந்தமான பள்ளிக்கூடம், காப்பகத்துக்கு எதிரே உள்ளது. காப்பகத்தில் தங்கி இருந்த அந்த 2 பேரும் அந்த பள்ளிக்கூடத்தில் 1-ம் வகுப்பு படித்தனர்.

நேற்று முன்தினம் காலையில் வழக்கம்போல் 2 பேரும் காப்பகத்தில் இருந்து பள்ளிக்கூடத்துக்கு சென்றனர். பின்னர் மதியம் சாப்பிடுவதற்காக அவர்கள் காப்பகத்துக்கு திரும்பி சென்று கொண்டு இருந்தனர். காப்பக வளாகத்தில் உள்ள கிணற்றில் தண்ணீர் உள்ளது. அதனை கம்பி வலையால் மூடி வைத்துள்ளனர். எனினும் கிணற்றுக்குள் ஒருவர் இறங்கி செல்லும் வகையில், துவாரம் உள்ளது.

அந்த வழியாக சென்று கொண்டிருந்த சந்தனகுமார் அந்த துவாரம் வழியாக கிணற்றுக்குள் எட்டி பார்த்தான். அப்போது எதிர்பாராதவிதமாக அவன் கிணற்றுக்குள் தவறி விழுந்தான். உடனே வேல்முருகன் கதறி அழுதான். இதை கவனித்த அக்கம்பக்கத்தினர் விரைந்து சென்று, கிணற்றுக்குள் இறங்கி சந்தனகுமாரை மீட்டு சிகிச்சைக்காக திருச்செந்தூர் தனியார் ஆஸ்பத்திரிக்கு கொண்டு சென்றனர். ஆனால் அங்கு அவனை பரிசோதித்த டாக்டர்கள், அவன் இறந்து விட்டதாக தெரிவித்தனர்.

இதுகுறித்து தகவல் அறிந்ததும், திருச்செந்தூர் தாலுகா போலீஸ் இன்ஸ்பெக்டர் (பொறுப்பு) ஷீஜா ராணி மற்றும் போலீசார் சம்பவ இடத்துக்கு விரைந்து சென்றனர். கிணற்றில் தவறி விழுந்து இறந்த சந்தனகுமாரின் உடலைக் கைப்பற்றி பரிசோதனைக்காக திருச்செந்தூர் அரசு ஆஸ்பத்திரிக்கு அனுப்பி வைத்தனர். இதுகுறித்து போலீசார் வழக்குப்பதிவு செய்து விசாரணை நடத்தி வருகின்றனர். திருச்செந்தூர் அருகே காப்பக வளாகத்தில் உள்ள கிணற்றில் தவறி விழுந்து மாணவன் உயிரிழந்த சம்பவம் அப்பகுதியில் பெரும் சோகத்தை ஏற்படுத்தியது.