நாகை அருகே மதுபாட்டில்கள் கடத்திய வாலிபர் கைது கார் பறிமுதல்

நாகப்பட்டினம்,

நாகை மாவட்டத்தில் மது-சாராயம் கடத்தலை தடுக்கும் வகையில் நாகை மாவட்ட போலீஸ் சூப்பிரண்டு விஜயகுமார் உத்தரவின் பேரிலும், உதவி போலீஸ் சூப்பிரண்டு பத்ரிநாராயணன் அறிவுறுத்தலின் படியும் திட்டச்சேரி போலீசார் வாழ்மங்களம் சோதனைச்சாவடியில் வாகன சோதனையில் ஈடுபட்டனர். அப்போது அந்த வழியாக வந்த காரை நிறுத்தி சோதனை செய்தனர். காரில் மதுபாட்டில்கள் இருந்தது தெரிய வந்தது. இதை தொடர்ந்து காரில் வந்தவரிடம் விசாரணை நடத்தினர். விசாரணையில் அவர் கோயம்புத்தூர் சவுரிபாளையம் சாலை, பெரியார் நகரை சேர்ந்த பழனிசாமி மகன் மனோஜ்குமார் (வயது 27) என்பதும், இவர் காரைக்கால் பகுதியில் இருந்து மதுப்பாட்டில்களை கடத்தி செல்வது தெரியவந்தது.

வாலிபர் கைது

இதுகுறித்து போலீசார் வழக்குப்பதிவு செய்து மனோஜ்குமாரை கைது செய்தனர். மேலும் அவரிடம் இருந்த 17 மதுப்பாட்டில்கள், 48 பீர் பாட்டில்களையும், கடத்தலுக்கு பயன்படுத்தப்பட்ட காரையும் பறிமுதல் செய்தனர்.