நொய்யல் ஆற்றில் சாயக்கழிவுநீர் கலப்பு: நோய் தாக்குதலால் வெற்றிலை சாகுபடி பாதிப்பு


நொய்யல் ஆற்றில் சாயக்கழிவுநீர் கலப்பு: நோய் தாக்குதலால் வெற்றிலை சாகுபடி பாதிப்பு
x
தினத்தந்தி 7 Feb 2019 10:45 PM GMT (Updated: 2019-02-08T02:19:06+05:30)

நொய்யல் ஆற்றில் சாயக்கழிவுநீர் கலப்பதன் காரணமாக, நோய் தாக்குதல் ஏற்பட்டு வெற்றிலை சாகுபடி பாதிக்கப்பட்டுள்ளது.

நொய்யல்,

கரூர் மாவட்டத்தில் வெற்றிலை விவசாயத்திற்கு புகழ் பெற்றது புகளூர் மற்றும் நொய்யல் வட்டாரம். இங்கு காவிரி ஆறு மற்றும் அதில் இருந்து பிரியும் புகளூர் வாய்க்கால், பள்ள வாய்க்கால், பாப்புலர் முதலியார் வாய்க்கால், வாங்கல் வாய்க்கால், நெரூர் வாய்க்கால் ஆகிய 5 வாய்க்கால்கள் மூலம் நீர்பாசனம் நடக்கிறது.

இங்கு விளையும் வெற்றிலைகள் உள்ளூர் வெற்றிலை மண்டிகளுக்கும், நாமக்கல் மாவட்டம், வேலூர் தினசரி மார்க்கெட்டுக்கும் கொண்டு செல்லப்படுகிறது. அங்கு ஏல முறையில் வாங்கப்படும் வெற்றிலைகள் தமிழகம் மற்றும் வட இந்தியாவிற்கு விற்பனைக்காக அனுப்பி வைக்கப்படுகிறது. நொய்யல் ஆறு மற்றும் காவிரி நீரில் சாயக்கழிவுநீர் மற்றும் தொழிற்சாலையின் கழிவுகள் கலந்து வருகின்றன. இந்த நீரை பாய்ச்சியதால், தற்போது புகளூர் மற்றும் நொய்யல் வட்டாரத்தில் மண்வளம் குறைந்ததுடன் நீரும் மாசடைந்துள்ளது. இதன் காரணமாக புகளூர் மற்றும் நொய்யல் வட்டாரத்தில் வெற்றிலை கொடிகளில் கணு அழுகல், இலைப்புள்ளி, வாடல்நோய் போன்ற நோய்களால் தாக்கப்பட்டுள்ளது.

இதன் காரணமாக புகளூர் மற்றும் நொய்யல் வட்டாரத்தில் உள்ள வெற்றிலை கொடிக்கால்களில் வெற்றிலை உற்பத்தி குறைந்து வருகிறது. இதனால் விவசாயிகளுக்கு பெரும் வருவாய் இழப்பு ஏற்பட்டு வருகிறது. இந்நிலையில் புகளூர் வேளாண்துறை அதிகாரி டாக்டர் திரவியம், கரூர் தோட்டக்கலை துறை உதவி இயக்குனர் ராஜவேலு, துணை இயக்குனர் மோகன்ராம், திருச்சி மகளிர் தோட்டக்கலைக் கல்லூரி பேராசிரியர் சங்கீதா, நபார்டு வங்கி பரமேஸ்வரன் ஆகியோர் கொண்ட குழுவினர் புகளூர் மற்றும் நொய்யல் பகுதி களுக்கு வந்தனர். அங்கு புகளூர் வட்டார வெற்றிலை விவசாயிகள் சங்க செயலாளர் ராமசாமி மற்றும் நிர்வாகிகள், விவசாயிகள் ஆகியோரை சந்தித்து பூச்சி மற்றும் நோய் பாதிப்புகள் குறித்து கேட்டறிந்தனர். பின்னர் அவர்கள் வெற்றிலைகளை தாக்கும் நோய் குறித்து தகவல் தெரிவித்தால், அதை போக்குவதற்கு உண்டான அனைத்து உதவிகளையும் செய்வதாக கூறினர். பின்னர் பாதிக்கப்பட்ட வெற்றிலை கொடிக்கால்களை பார்வையிட்டு ஆய்வு செய்ததுடன், வெற்றிலைகள், மண்வகைகள், நீர் ஆகியவற்றின் மாதிரிகளை சேகரித்து ஆய்வுக்காக எடுத்து சென்றனர். 

Next Story