மதில் மேல் பூனையாக இருக்கும் தே.மு.தி.க. - தொடர்ந்து பேச்சுவார்த்தை நடத்தி வருவதாக எடப்பாடி பழனிசாமி பேட்டி

சேலம்,

தமிழகத்தில், நாடாளுமன்ற தேர்தலில் வலுவான கூட்டணியை அமைத்தால்தான் வெற்றி பெற முடியும் என்ற நிலையில் கட்சிகள் உள்ளன.

ஆளும் அ.தி.மு.க. தலைமையிலான கூட்டணியில் பா.ம.க.வுக்கு 7 தொகுதிகளும், பாரதீய ஜனதாவுக்கு 5 தொகுதிகளும், என்.ஆர்.காங்கிரசுக்கு ஒரு தொகுதியும் ஒதுக்கப்பட்டு உள்ளன. மற்ற கூட்டணி கட்சிகளுடன் அ.தி.மு.க. தலைவர்கள் பேச்சுவார்த்தை நடத்தி வருகிறார்கள்.

தி.மு.க. தலைமையிலான கூட்டணியில் காங்கிரசுக்கு 10 தொகுதிகளும், இந்திய யூனியன் முஸ்லிம் லீக் கட்சிக்கு ஒரு தொகுதியும் ஒதுக்கப்பட்டு இருக்கிறது. விடுதலை சிறுத்தைகள், கம்யூனிஸ்டுகள் உள்ளிட்ட கட்சிகளுடன் தொடர்ந்து பேச்சுவார்த்தை நடைபெற்று வருகிறது.

கணிசமான வாக்கு வங்கியை வைத்து இருக்கும் தே.மு.தி.க.வின் நிலை என்ன? என்பதுதான் இப்போது மிகப்பெரிய கேள்விக்குறியாக உள்ளது.

தே.மு.தி.க.வுடன் அ.தி.மு.க. தலைவர்கள் ஏற்கனவே பேச்சுவார்த்தை நடத்தி வந்த நிலையில், தி.மு.க. தலைவர் மு.க.ஸ்டாலின் சமீபத்தில் அக்கட்சியின் தலைவர் விஜயகாந்தை சந்தித்து பேசியது பெரும் பரபரப்பை ஏற்படுத்தியது. இதனால் தி.மு.க. கூட்டணியில் தே.மு.தி.க. இணையுமா? என்ற எதிர்பார்ப்பும் எழுந்தது.

அ.தி.மு.க. கூட்டணியில் பா.ம.க.வுக்கு சமமான தொகுதிகளை தே.மு.தி.க. கேட்பதாகவும், இதனால்தான் இழுபறி நிலை நீடித்து வருவதாகவும் கூறப்படுகிறது.

இந்த நிலையில், நாடாளுமன்ற தேர்தலில் தனித்து போட்டியிடவும் தயார் என்று தே.மு.தி.க. பொருளாளர் பிரேமலதா அதிரடியாக அறிவித்தார். இதைத்தொடர்ந்து தே.மு.தி.க. சார்பில் போட்டியிட விருப்ப மனுக்கள் வழங்கப்பட்டு வருகின்றன.

என்றாலும் அந்த கட்சி அ.தி.மு.க. கூட்டணியில் சேருமா? அல்லது தி.மு.க. அணியில் இணையுமா? அல்லது இரு கட்சிகளையும் தவிர்த்து விட்டு, ‘என் வழி தனி வழி’ என்று தனித்து களம் இறங்குமா? என்பது பற்றி இதுவரை உறுதியாக எதுவும் தெரியவில்லை.

தற்போதைய நிலையில், அந்த கட்சி மதில் மேல் பூனையாகவே இருக்கிறது.

இந்த நிலையில், சென்னையில் நேற்று நிருபர்களிடம் பேசிய அமைச்சர் ஜெயக்குமார், தே.மு.தி.க. தங்கள் அணிக்கு வந்தால் மகிழ்ச்சி என்றும், வராவிட்டால் கவலை இல்லை என்றும் கூறினார்.

தொகுதிகள் எண்ணிக்கை விஷயத்தில் உறுதியாக இருக்கும் தே.மு.தி.க.வை, தங்கள் பக்கம் இழுக்க அ.தி.மு.க. தொடர்ந்து தீவிர முயற்சி செய்து வருகிறது. இதற்காக அந்த கட்சியுடன் அ.தி.மு.க. தொடர்ந்து பேச்சுவார்த்தை நடத்தி வருவதாக முதல்-அமைச்சர் எடப்பாடி பழனிசாமி நேற்று சேலத்தில் நிருபர்களிடம் தெரிவித்தார்.

சேலத்தில் நேற்று நடைபெற்ற அரசு விழாவில் பங்கேற்ற அவர், பின்னர் நிருபர்களுக்கு அளித்த பேட்டியில் கூறியதாவது:-

நாடாளுமன்ற தேர்தலில் பா.ம.க.வுடன் கூட்டணி வைத்து உள்ளோம். அ.தி.மு.க-பா.ம.க. கூட்டணியில் எந்த குழப்பமும் இல்லை. ஒப்பந்தம் முடிந்து கையெழுத்திட்டு உள்ளனர். நாங்கள் இணைந்து போட்டியிடுவது உறுதி. ஒவ்வொரு தேர்தல் வரும்போதும் கூட்டணி என்பது வரும். கடந்த காலங்களில் தி.மு.க.வை விமர்சனம் செய்தபோது கூட அவர்கள் பா.ம.க.வுடன் கூட்டணி வைத்தார்கள். தற்போது அ.தி.மு.க.வுடன் பா.ம.க. கூட்டணி வைத்துள்ளது. அதாவது, கூட்டணி என்பது வேறு. கொள்கை என்பது வேறு.

நாடாளுமன்ற தேர்தலில் மேலும் சில கட்சிகளுடன் அ.தி.மு.க. சார்பில் பேச்சுவார்த்தை நடத்தப்பட்டு வருகிறது. தே.மு.தி.க.வுடன் தொடர்ந்து பேச்சுவார்த்தை நடத்தி வருகிறோம்.

மேலும் சில கட்சிகளுடன் கூட்டணி பேச்சுவார்த்தை நடத்தி வருவதால் அது முடிந்தவுடன்தான், அ.தி.மு.க. எத்தனை தொகுதிகளில் போட்டியிடும் என்பது பற்றி தெரியவரும். நாங்கள் அமைத்திருப்பது மெகா கூட்டணி.

டி.டி.வி.தினகரன் முதலில் அவரது கட்சியை பதிவு செய்தாரா? இல்லையா? என்பது தெரியவில்லை. அவர் தமிழகம் மட்டுமின்றி நாடு முழுவதும் உள்ள அனைத்து தொகுதிகளிலும் போட்டியிடட்டும். அதைப்பற்றி எங்களுக்கு கவலையில்லை.

கடந்த 2014-ம் ஆண்டு நடந்த நாடாளுமன்ற தேர்தலில் அ.தி.மு.க. தன்னந்தனியாக நின்று 37 தொகுதிகளில் வெற்றி பெற்று இந்திய அளவில் 3-வது பெரிய கட்சியாக திகழ்ந்தது. அதேபோல், இந்த நாடாளுமன்ற தேர்தலில் 40 தொகுதிகளிலும் அ.தி.மு.க. கூட்டணி வெற்றி பெறும். அதேபோல், 21 சட்டமன்ற தொகுதி இடைத்தேர்தலிலும் அமோக வெற்றி பெறுவோம். 2021-ம் ஆண்டு சட்டமன்ற தேர்தலிலும் அ.தி.மு.க. வெற்றி பெற்று ஆட்சி அமைக்கும். தமிழகத்தை பொறுத்தவரையில் அ.தி.மு.க. தலைமையில் தான் கூட்டணி. மத்தியில் பாரதீய ஜனதா கட்சி தலைமையில் கூட்டணி.

மத்தியில் வலுவான கூட்டணி அமைந்தால் தான் மக்களுக்கு தேவையான வளர்ச்சிப்பணிகளை செய்ய முடியும். 8 வழி விரைவுச்சாலை அமைப்பது தொடர்பாக நீதிமன்றத்தில் வழக்கு தொடரப்பட்டு உள்ளது. இதனால் அதுபற்றி எதுவும் கூற இயலாது. இவ்வாறு எடப்பாடி பழனிசாமி கூறினார்.

இதைத்தொடர்ந்து அவரிடம், சமூக ஆர்வலர் முகிலன் கடந்த சில நாட்களாக மாயமாகி விட்டாரே? என்று கேள்வி எழுப்பப்பட்டது. அதற்கு அவர் பதில் அளிக்கையில், “தமிழகத்தில் உள்ள ஒவ்வொருவரும் எங்கு உள்ளனர் என்று எல்லோருக்கும் தெரியாது. அவர் எங்கு உள்ளார்? என்பது குறித்து போலீசார் விசாரணை நடத்தி வருகின்றனர்” என்றார்.