85 நாட்களுக்குப் பிறகு பாம்பன் பாலம் வழியாக ரெயில் சேவை தொடங்கியது - சுற்றுலா பயணிகள் மகிழ்ச்சி

ராமேசுவரம்,

ராமேசுவரம் தீவை மண்டபத்துடன் இணைக்கும் பாம்பன் ரெயில் பாலம் அமைக்கப்பட்டு 100 ஆண்டுகளுக்கு மேலாகி விட்டது. அவ்வப்போது இந்த பாலத்தில் மராமத்து பணிகள் மேற்கொள்ளப்பட்டு தொடர்ந்து ரெயில் சேவை இருந்து வந்தது. இந்த நிலையில் கடந்த டிசம்பர் 4-ந்தேதி பாம்பன் ரெயில் பாலத்தின் மையப்பகுதியில் அமைந்துள்ள தூக்குப் பாலத்தில் விரிசல் ஏற்பட்டதன் காரணமாக ராமேசுவரத்துக்கு ரெயில் போக்குவரத்து நிறுத்தப்பட்டது. இதனால் ராமேசுவரம் வரும் அனைத்து ரெயில்களும் மண்டபத்துடன் நிறுத்தப்பட்டு பின்னர் அங்கிருந்து மறுமார்க்கத்தில் இயக்கப்பட்டு வந்தது.

இதனிடையே தூக்குப்பாலத்தில் ஏற்பட்ட விரிசலை சரி செய்யும் பணியும், பராமரிப்பு பணியும் மேற்கொள்ளப்பட்டு அனைத்து பணிகளும் பிப்ரவரி முதல் வாரத்திலேயே நிறைவடைந்தன. அதனைத் தொடர்ந்து பயணிகள் இல்லாமல் வெறும் ரெயில் பெட்டிகள் மட்டும் பாம்பன் பாலம் வழியாக ராமேசுவரம் கொண்டு வரப்பட்டு சுத்தம் செய்து தண்ணீர் நிரப்பி மண்டபம் ரெயில் நிலையத்துக்கு அனுப்பி வைக்கப்பட்டன. பாலத்தின் உறுதிச் சான்றிதழை பாதுகாப்பு ஆணையம் வழங்காமல் இருந்ததால் ராமேசுவரத்தில் இருந்து ரெயில் போக்குவரத்து தொடங்குவது காலதாமதமாகி வந்தது.

இந்த நிலையில் கடந்த 2 நாட்களுக்கு முன்பு உறுதி சான்றிதழ் கிடைக்கப்பெற்றதை தொடர்ந்து ராமேசுவரத்திற்கு ரெயில் சேவை தொடங்க நடவடிக்கை எடுக்கப்பட்டது. பாம்பன் பாலத்தில் ஏற்கனவே ரெயில்கள் அனைத்தும் 20 கிலோ மீட்டர் வேகத்தில் இயக்கப்பட்டு வந்தன. தற்போது இந்த பாலத்தில் ரெயில்களை 10 கிலோ மீட்டர் வேகத்தில் மட்டுமே இயக்க முடிவு செய்யப்பட்டுள்ளது. அதனைத் தொடர்ந்து 85 நாட்களுக்கு பிறகு பாம்பன் பாலத்தின் வழியாக நேற்று ராமேசுவரத்துக்கு மீண்டும் ரெயில் போக்குவரத்து தொடங்கியது.

இதில் முதல் ரெயிலாக உத்தரபிரதேசம் மண்வாடி பகுதியில் இருந்து புறப்பட்ட ரெயில் நேற்று நள்ளிரவு 1 மணி அளவில் ராமேசுவரம் ரெயில் நிலையத்தை அடைந்தது. அதனைத் தொடர்ந்து வரிசையாக ரெயில்கள் இயக்கப்பட்டன.