சேலம் மாநகரில் சாலை விபத்துகளில் 45 பேர் சாவு

சேலம், 

சேலம் மாநகரத்தில் சாலை விபத்துகளை தடுக்க மாநகர காவல் துறை சார்பில் பல்வேறு நடவடிக்கைகள் எடுக்கப்பட்டு வருகின்றன. அதன்படி கடந்த ஆண்டு விபத்துகள் ஏற்பட்டு உயிரிழப்பு நடைபெற்ற இடங்கள், அந்த இடத்தில் விபத்திற்கான காரணங்கள், விபத்தை குறைப்பதற்கான வழிமுறைகள் உள்ளிட்டவை குறித்து ஆய்வு செய்யப்பட்டது. இதையடுத்து தேவையான இடங்களில் சிக்னல் கம்பங்கள் அமைத்தல், சென்டர் மீடியன், விழிப்புணர்வு பதாகைகள் அமைத்தல் உள்ளிட்ட பல்வேறு விபத்து தடுப்பு முன்னெச்சரிக்கை நடவடிக்கைகள் மேற்கொள்ளப்பட்டன.

மேலும் இரு சக்கர வாகனங்களில் செல்வோர் ஹெல்மெட் அணிந்தும், சாலை விதிகளை பின்பற்றுமாறும் போலீசார் தொடர்ந்து விழிப்புணர்வு ஏற்படுத்தி வருகின்றனர். இதேபோல் மது குடித்துவிட்டு வாகனம் ஓட்டுதல், சிக்னலை பின்பற்றாதவர்கள், அதிகமான பயணிகளை ஆட்டோவில் ஏற்றி செல்பவர்கள், ஹெல்மெட் அணியாமல் இருசக்கர வாகனங்களை இயக்குபவர்கள் மற்றும் சாலை விதிகளை மீறுபவர்கள் ஆகியோர் மீது போலீசார் வழக்குப்பதிவு செய்து அபராதம் விதித்து வருகின்றனர்.

இதுகுறித்து போலீஸ் அதிகாரிகள் கூறுகையில், கடந்த ஜனவரி மாதத்தில் இருந்து நேற்று முன்தினம் வரை 45 பேர் சாலை விபத்துகளில் இறந்துள்ளனர். 284 பேர் காயம் அடைந்துள்ளனர். கடந்த 2018-ம் ஆண்டு இதே காலக்கட்டத்தில் 52 பேர் சாலை விபத்தில் இறந்துள்ளனர். 299 பேர் விபத்துகளில் காயம் அடைந்துள்ளனர். மேலும் சாலை விபத்துகளை குறைக்க தீவிரமாக நடவடிக்கை எடுக்கப்பட்டு வருகிறது என்றனர்.