மும்பை பெருநகர பகுதியில் மேலும் 3 மெட்ரோ ரெயில் வழித்தடம் : மாநில மந்திரி சபை ஒப்புதல்

மும்பை,

மும்பை பெருநகர எல்கைக்குட்பட்ட பகுதிகளில் பெருகி வரும் போக்குவரத்து தேவையை கருத்தில் கொண்டும், சாலைகளில் போக்குவரத்து நெரிசலை குறைக்கும் நடவடிக்கையாகவும் மெட்ரோ ரெயில் திட்டங்கள் செயல்படுத்தப்பட்டு வருகின்றன.

இதில், புறநகர் காட்கோபர் - வெர்சோவா இடையே தற்போது மெட்ரோ ரெயில்கள் இயங்கி வருகின்றன.

கொலபா-பாந்திரா-சீப்ஸ், வடலா-காசர்வடவலி, தகிசர் - டி.என். நகர், அந்தேரி கிழக்கு - தகிசர் கிழக்கு உள்ளிட்ட மெட்ரோ ரெயில் திட்டப்பணிகள் நடந்து வருகின்றன.

இந்த நிலையில், 10-வது மெட்ரோ வழித்தடம் தானே - காய்முக் - சிவாஜி சவுக் இடையே 11 கி.மீ. தூரத்திற்கு ரூ.5 ஆயிரம் கோடி செலவிலும், 11-வது மெட்ரோ வழித்தடம் வடலா - மும்பை சி.எஸ்.எம்.டி. இடையே சுரங்க மார்க்கமாக 14 கி.மீ. தூரத்துக்கு ரூ.8 ஆயிரம் கோடி செலவிலும், 12-வது மெட்ரோ ரெயில் வழித்தடம் கல்யாண் - நவிமும்பை தலோஜா இடையே 25 கி.மீ. தூரத்துக்கு ரூ.11 ஆயிரம் கோடி செலவிலும் செயல்படுத்தப்பட உள்ளன.

மேற்படி மும்பை பெருநகர பகுதியில் அமைய உள்ள இந்த மூன்று மெட்ரோ ரெயில் திட்டங்களுக்கும் நேற்று முதல்-மந்திரி தேவேந்திர பட்னாவிஸ் தலைமையில் நடந்த மாநில மந்திரி சபை கூட்டத்தில் ஒப்புதல் அளிக்கப்பட்டது.