அத்திவரதர் தரிசன நேரத்தில் நாளை மாற்றம் காஞ்சீபுரம் கலெக்டர் தகவல்

காஞ்சீபுரம்,

காஞ்சீபுரத்தில் மாவட்ட கலெக்டர் பொன்னையா நிருபர்களிடம் கூறியதாவது:-

காஞ்சீபுரம் வரதராஜ பெருமாள் கோவிலில் வருகிற 1-ந்தேதி முதல் அத்திவரதர் நின்ற கோலத்தில் காட்சியளிக்க உள்ளார். இதனால் தரிசன நேரத்தில் மாற்றம் செய்யப்பட்டுள்ளது. இதன்படி நாளை மதியம் 12 மணிக்கு நடை அடைக்கப்பட்டு கோவில் உள்ளே வந்தவர்கள் மாலை 5 மணி வரை மட்டுமே அத்திவரதரை தரிசிக்க அனுமதிக்கப்படுவார்கள்.

இதேபோல் ‘வி.வி.ஐ.பி. பாஸ்’ வைத்துள்ளவர்கள் மாலை 3 மணிக்கு மேல் அத்திவரதரை தரிசனம் செய்ய அனுமதியில்லை. டோனர் பாஸ், வி.ஐ.பி. பாஸ் வைத்துள்ளவர்கள் மதியம் 12 மணி வரையிலும், ஆன்லைன் மூலம் டிக்கெட் வாங்கியவர்கள் மதியம் 12 மணி முதல் மாலை 3 மணி வரை மட்டுமே அனுமதிக்கப்படுவார்கள்.

ஆடிப்பூரம்

1-ந்தேதி அதிகாலை 5 மணியில் இருந்து எப்போதும்போல பக்தர்கள் அத்திவரதரை நின்ற கோலத்தில் தரிசிக்க அனுமதிக்கப்படுவார்கள் மேலும் 3-ந்தேதி ஆடிப்பூரத்தை முன்னிட்டு ஆண்டாள் திருக்கல்யாணம் நடைபெற உள்ளதால் அன்று மதியம் 3 மணிக்கு கோவில் நடை அடைக்கப்பட்டு கோவில் உள்ளே வந்தவர்கள் மட்டும் மாலை 5 மணி வரை அத்திவரதரை தரிசிக்க அனுமதிக்கப்படுவார்கள்.

மாலை 5 மணி முதல் இரவு 8 மணி வரை அத்திவரதரை தரிசிக்க அனுமதி கிடையாது. திருக்கல்யாணம் முடிந்த பின்னர் இரவு 8 மணியில் இருந்து நள்ளிரவு வரை தரிசிக்கலாம். அதேபோல் 15-ந்தேதி கருட சேவை உற்சவம் நடைபெற உள்ளதால் மாலை 5 மணிக்கு மேல் தரிசனம் செய்ய அனுமதி இல்லை.

ஏற்கனவே 2 போலீஸ் ஐ.ஜி.க்கள், 3 டி.ஐ.ஜி.கள், ஒரு போக்குவரத்து டி.ஐ.ஜி., 16 மாவட்ட போலீஸ் சூப்பிரண்டுகள், 48 துணை போலீஸ் சூப்பிரண்டுகள், 5,100 போலீசார் பாதுகாப்பு பணியில் உள்ளனர்.

அத்திவரதர் நின்ற கோலத்தில் காட்சியளிக்கும் தினத்தில் மேலும் 3 ஆயிரம் போலீசார் பாதுகாப்பு பணியில் ஈடுபடுத்தப்படுவார்கள். இவ்வாறு கலெக்டர் பொன்னையா தெரிவித்தார்.

இதற்கிடையே 29-வது நாளான நேற்று ஆரஞ்சு நிற பட்டாடையில் அருள்பாலித்த அத்திவரதரை ஏராளமான பக்தர்கள் நீண்ட வரிசையில் காத்திருந்து வழிபட்டனர்.

மேலும் பழம்பெரும் நடிகை கே.ஆர்.விஜயா குடும்பத்துடன், அத்திவரதரை தரிசனம் செய்தார்.