கிறிஸ்துமஸ் பண்டிகையையொட்டி நள்ளிரவில் தேவாலயங்களில் சிறப்பு பிரார்த்தனை

புதுச்சேரி,

கிறிஸ்துமஸ் பண்டிகை உலகம் முழுவதும் இன்று (புதன்கிழமை) சிறப்பாக கொண்டாடப்படுகிறது. புதுச்சேரியில் உள்ள அனைத்து தேவாலயங்களிலும் கிறிஸ்துமஸ் பண்டிகையையொட்டி நேற்று நள்ளிரவு சிறப்பு பிரார்த்தனை நடைபெற்றது.

புதுச்சேரி ரெயில் நிலையம் அருகே உள்ள தூய இருதய ஆண்டவர் பசிலிக்காவில் பங்குத்தந்தை குழந்தை சாமி தலைமையில் சிறப்பு பிரார்த்தனை நடைபெற்றது. முன்னதாக 10.30 மணிக்கு கிறிஸ்து பிறப்பு பாடலுடன் விழா தொடங்கியது. தொடர்ந்து திருப்பலி மற்றும் கிறிஸ்து பிறப்பு திருப்பலி நடந்தது.

அப்போது ஏசு கிறிஸ்து பிறப்பதை குறிக்கும் வகையில் குழந்தை ஏசுவின் சொரூபம், ஆலய வளாகத்தில் அமைக்கப்பட்டிருந்த குடிலில் வைக்கப்பட்டது. இதில் கலந்துகொண்ட அனைவரும் ஒருவருக்கொருவர் கிறிஸ்துமஸ் வாழ்த்துகளை தெரிவித்து கொண்டனர்.

ஜென்மராக்கினி தேவாலயம்

புதுவை மிஷன் வீதியில் உள்ள ஜென்மராக்கினி மாதா தேவாலயத்தில் புதுச்சேரி - கடலூர் உயர்மறை மாவட்ட பேராயர் அந்தோணி ஆனந்தராயர் தலைமையில் கிறிஸ்து பிறப்பு விழா திருப்பலி நடந்தது.

இதில் முதன்மை குரு அருளானந்தம், அருட்தந்தை திரகோரி, அல்போன்ஸ் சந்தானம், ஆரோக்கியதாஸ் ஆகியோர் பங்கேற்றனர். இரவு 11.50 மணிக்கு ஏசு பிறப்பை குறிக்கும் வகையில் குழந்தை ஏசுவின் சொரூபம், ஆலய வளாகத்தில் அமைக்கப்பட்டிருந்த விசேஷ குடிலில் வைக்கப்பட்டது. அதைத்தொடர்ந்து சிறப்பு பிரார்த்தனையும் நடந்தது.

முதல்-அமைச்சர் பங்கேற்பு

நெல்லித்தோப்பில் உள்ள புனித விண்ணேற்பு அன்னை ஆலயத்தில் பங்குதந்தைகள் வின்சென்ட், ஆல்வின், அந்தோணி ராஜ் ஆகியோர் தலைமையில் கிறிஸ்துமஸ் கூட்டுத்திருப்பலி நடந்தது.

விழாவில் முதல்-அமைச்சர் நாராயணசாமி, ஜான்குமார் எம்.எல்.ஏ. கலந்துகொண்டு ஆலய வளாகத்தில் வைக்கப்பட்டிருந்த குடிலில் உள்ள ஏசுவின் சொரூபத்தை வணங்கினார். அதைத்தொடர்ந்து அவர், அங்கிருந்த அனைவருக்கும் கிறிஸ்துமஸ் வாழ்த்துகளை தெரிவித்தார்.

ரெயின்போ நகர் புனித ஜான்மரி வியான்னி ஆலயத்தில் பங்குதந்தை டொம்னிக் ரெசாரியோ தலைமையில் நடைபெற்ற விழாவில் முதல்-அமைச்சர் நாராயணசாமி, வைத்திலிங்கம் எம்.பி. கலந்துகொண்டு, கிறிஸ்தவர்களுக்கு வாழ்த்துகளை தெரிவித்து, இனிப்புகள் வழங்கினார்.

புதுச்சேரி அரசு ஆஸ்பத்திரி அருகே உள்ள தூய யோவான் தேவாலய ஆயர் ஹென்றி ஜெபா ரிச்சர்ட் தலைமையில் சிறப்பு ஆராதனை நடந்தது.

வில்லியனூர் மாதா கோவில்

தட்டாஞ்சாவடியில் உள்ள பாத்திமா தேவாலயம், வில்லியனூர் மாதா கோவில், அரியாங்குப்பம் புனித ஆரோக்கிய அன்னை ஆலயம், ஆட்டுப்பட்டி அந்தோணியார் ஆலயம், முத்தியால்பேட்டை புனித அந்தோணியார் ஆலயம் உள்பட புதுவையில் உள்ள அனைத்து தேவாலயங்களில் நள்ளிரவு சிறப்பு திருப்பலியும், பிரார்த்தனையும் நடந்தன.