துபாயில் இருந்து விமானம் மூலம் மங்களூருவுக்கு கடத்தப்பட்ட ரூ.63.73 லட்சம் தங்கம் பறிமுதல்

மங்களூரு, 

தட்சிண கன்னடா மாவட்டம் மங்களூரு அருகே பஜ்பே சர்வதேச விமான நிலையம் அமைந்துள்ளது. அங்கு சுங்கத்துறை அதிகாரிகளும், மத்திய தொழில் பாதுகாப்பு படையினரும் பாதுகாப்பு பணியில் ஈடுபட்டு வருகிறார்கள். அவர்கள் விமான நிலையத்திற்கு வரும் பயணிகளையும், அவர்களின் உடமைகளையும் தீவிர சோதனைக்கு உட்படுத்துகின்றனர்.

இந்த நிலையில் கடந்த 6-ந் தேதி துபாயில் இருந்து ஏர் இந்தியா விமானம் மூலம் மங்களூருவுக்கு பல பயணிகள் வந்தனர். அவர்களின் உடமைகளை சுங்கத்துறை அதிகாரிகள் சோதனை செய்தனர். அப்போது ஒரு பயணி நூதன முறையில் காலுறையில் மறைத்து வைத்து தங்கத்தை கடத்தி வந்தது தெரியவந்தது. இதையடுத்து அவரை அதிகாரிகள் பிடித்தனர். அவர் கடத்தி வந்த ரூ.13.43 லட்சம் மதிப்பிலான தங்கத்தை பறிமுதல் செய்தனர்.

அதேபோல் கடந்த 7-ந் தேதி துபாயில் இருந்து மங்களூருவுக்கு விமானத்தில் 2 பயணிகள் வந்தனர். அவர்களும் நூதன முறையில் தங்கத்தை கடத்தி வந்தனர். இதையடுத்து அவர்கள் 2 பேரையும் சுங்கத்துறை அதிகாரிகள் பிடித்தனர். அவர்கள் கடத்தி வந்த ரூ.50.30 லட்சம் மதிப்பிலான தங்கத்தை அதிகாரிகள் பறிமுதல் செய்தனர்.

அதையடுத்து பிடிபட்ட 3 பேரையும், அவர்களிடமிருந்து பறிமுதல் செய்யப்பட்ட ரூ.63.73 லட்சம் மதிப்பிலான தங்கத்தையும் விமான நிலைய போலீசாரிடம் சுங்கத்துறை அதிகாரிகள் ஒப்படைத்தனர். அதன்பேரில் விமான நிலைய போலீசார் அந்த 3 பேரையும் கைது செய்து, அவர்கள் மீது வழக்குப்பதிந்து விசாரணை நடத்தி வருகிறார்கள்.