ஜமாத் தலைவர்களுடன் கொரோனா தடுப்பு நடவடிக்கை குறித்த விழிப்புணர்வு கூட்டம் - கலெக்டர் சந்தீப் நந்தூரி தலைமையில் நடந்தது

தூத்துக்குடி, 

தூத்துக்குடி மாவட்ட கலெக்டர் அலுவலகத்தில் ஜமாத் தலைவர்களுடன் கொரோனா தடுப்பு நடவடிக்கைள் மற்றும் விழிப்புணர்வு கூட்டம் நடந்தது. கூட்டத்துக்கு கலெக்டர் சந்தீப் நந்தூரி தலைமை தாங்கினார். மாவட்ட போலீஸ் சூப்பிரண்டு அருண்பாலகோபாலன் முன்னிலை வகித்தார். கூட்டத்தில் கலெக்டர் சந்தீப் நந்தூரி பேசியதாவது:-

டெல்லியில் இருந்து தூத்துக்குடி மாவட்டத்துக்கு வருகை தந்தவர்களில் சிலர் இதுவரை எந்த தகவலும் மாவட்ட நிர்வாகத்துக்கு தெரிவிக்கவில்லை. அவர்களுக்கு கொரோனா தொற்று பரிசோதனை செய்ய அரசு ஏற்கனவே அறிவித்துள்ளது. இவர்களை கண்டுபிடிக்க ஜமாத் தலைவர்கள் உதவி செய்ய வேண்டும். காயல்பட்டினம் நகராட்சி பகுதியில் சுமார் 15 முதல் நிலை தொடர்பாளர்கள் தொடர்ந்து கண்காணிக்கப்பட்டு வருகிறார்கள். கொரோனா தொற்று நோயினால் பாதிக்கப்பட்ட காயல்பட்டினம் டாக்டரின் குடும்ப உறுப்பினர்கள் சுமார் 15 பேருக்கு தொற்றுநோய் பரிசோதனை செய்ய நடவடிக்கை எடுக்கப்பட்டுள்ளது. தொற்றுநோய் உறுதியான டாக்டர் பல நாட்கள் நோயாளிகளுக்கு பல்வேறு சிகிச்சைகள் அளித்துள்ளார்.

ஒரு சமுதாய மக்களை தனிமைப்படுத்துவதாக நினைக்காமல் கொரோனா வைரஸ் தடுப்பு பணிகளை மேற்கொள்ள நீங்கள் உறுதுணையாக இருக்க வேண்டும். ஜமாத் தலைவர்கள் ஒவ்வொரு வீட்டிலும் அரசு மேற்கொள்ளும் நடவடிக்கைகள் குறித்து விழிப்புணர்வு ஏற்படுத்த வேண்டும். சுகாதாரத்துறை அலுவலர்கள் விவரங்களை கேட்கும்பட்சத்தில் அவர்களுக்கு தேவையான தகவல் தெரிவிக்க வேண்டும். இந்த நோய் பரவாமல் தடுக்க உங்களது ஒத்துழைப்பு கண்டிப்பாக தேவைப்படுகிறது. தனிமைப்படுத்தப்பட்ட நபர்களின் வீட்டின் முன்பாக ஒட்டப்பட்டுள்ள நோட்டீஸ்களை பல்வேறு நபர்கள் கிழித்துவிட்டு தெருக்களில் நடமாடுகின்ற தகவல் கிடைத்துள்ளது.

இவர்கள் மீது அரசு நடவடிக்கை எடுக்க தெரிவித்துள்ளது. சமூக இடைவெளியை பொதுமக்கள் கண்டிப்பாக பின்பற்ற வேண்டும். காயல்பட்டினம் நகராட்சி பகுதியில் கொரோனா தொற்று உறுதி செய்யப்பட்டவர்களின் தெரு பகுதியில் சீல் வைக்கப்பட்டுள்ளது. அவர்களுக்கு தேவையான பொருட்கள் கிடைப்பதற்கு தன்னார்வலர்கள் மூலம் நடவடிக்கை எடுக்கப்பட்டுள்ளது. இதுவரை காயல்பட்டினம் நகராட்சிக்கு உட்பட்ட பகுதிகளில் 2 பேருக்கு கொரோனா தொற்று ஏற்பட்டுள்ளது. ஏற்கனவே அவர்கள் குடும்ப உறுப்பினர்களை தனிமைப்படுத்தி உடல் நலம் விவரங்கள் சேகரிக்கப்பட்டு வருகிறது.

கொரோனா வைரஸ் தொற்றுநோய் வயது வித்தியாசமின்றி யாருக்கு வேண்டுமானாலும் பரவ வாய்ப்புள் ளது.

ஆகவே குழந்தைகள், முதியோர்களை வீட்டில் இருந்து வெளியே வர அனுமதிக்கக்கூடாது. பொதுமக்கள் முக கவசங்களை கட்டாயமாக அணிய வேண்டும். ஜமாத் தலைவர்கள் தங்களது பகுதிகளில் ஒலிப்பெருக்கி மூலம் பொதுமக்களிடையே அரசு மேற்கொள்ளும் நடவடிக்கைகள் குறித்து விழிப்புணர்வு ஏற்படுத்த வேண்டும். இந்த நோய் பரவாமல் தடுக்க விரைந்து நடவடிக்கை எடுத்தால் மட்டும்தான் இந்த நோயை கட்டுப்படுத்த முடியும். அதற்கு உங்களது முழு ஒத்துழைப்பு மாவட்ட நிர்வாகத்துக்கு தேவைப்படுகிறது.

உங்களுக்கு தேவையான பாஸ் உள்ளிட்ட வசதிகளை மாவட்ட நிர்வாகம் ஏற்படுத்தி தரும். காயல்பட்டினம் மருத்துவமனையில் மருத்துவ குழு மற்றும் ஆம்புலன்ஸ் தயார் நிலையில் உள்ளது. பொதுமக்கள் அதனை பயன்படுத்திக்கொள்ள வேண்டும். எந்தவொரு மதம், சமுதாய பிரிவினையை ஏற்படுத்தும் நபர்கள் மீது உடன் நடவடிக்கை எடுக்கப்படும். எனவே அனைவரும் மாவட்ட நிர்வாகத்துக்கு நோய் பரவாமல் இருக்க ஒத்துழைப்பு தர வேண்டும்.

இவ்வாறு அவர் கூறினார்.

கூட்டத்தில் கூடுதல் கலெக்டர்(வருவாய்) விஷ்ணுசந்திரன், உதவி கலெக்டர் சிம்ரான்ஜீத் சிங் கலோன் மற்றும் ஜமாத் தலைவர்கள் கலந்து கொண்டனர்.