குறைந்த தொழிலாளர்களை கொண்டு ஆடைகள் தயாரிக்க அனுமதிக்க வேண்டும் - பிரதமருக்கு, ஏற்றுமதியாளர் சங்க தலைவர் கடிதம்

திருப்பூர்,

கொரோனா வைரஸ் தொற்று நோயால் நாடு முழுவது முழுவதுமாக ஊரடங்கு அமல்படுத்தப்பட்டுள்ளது. இந்தியாவில் உள்ள அனைத்து தொழில் நிறுவனங்களும் அடைக்கப்பட்டுள்ளது. கோடிக்கணக்கான தொழிலாளர்கள் தங்களை தனிமைப்படுத்திக்கொண்டனர். திருப்பூர் பின்னலாடை ஏற்றுமதி நிறுவனங்கள் ஆண்டுக்கு ரூ.26 ஆயிரம் கோடிக்கு கோடை, குளிர்கால ஆடைகளை தயாரித்து அமெரிக்கா, ஐரோப்பா, இங்கிலாந்து உட்பட பல்வேறு உலக நாடுகளுக்கு ஏற்றுமதி செய்கிறது. இதன் மூலம் 6 லட்சம் தொழிலாளர்கள் நேரடியாகவும், 2 லட்சம் தொழிலாளர்கள் மறைமுகமாக வேலை வாய்ப்பு பெறுகின்றனர்.

கொரோனா வைரஸ் தொற்று ஏற்பட்டு தற்போது படிப்படியாக மீண்டு வரும் சீனா, மற்றும் வங்கதேசம், கம்போடியா, பின்னலாடை நிறுவனங்களின் எதிர்காலத்தை கருத்தில்கொண்டு புதிய ஆர்டர்கள் பெறும் வகையில் மாதிரி ஆடைகளை தயாரித்து உலக பையர்களுக்கு அனுப்பி புதிய ஆர்டர்கள் பெற அனுமதி அளித்துள்ளது. இதனால்,அந்நாடுகளுக்கு புதிய ஆர்டர்கள் கிடைக்க வாய்ப்பு உள்ளது.

இந்தியாவில் ஊரடங்கு உத்தரவு முடியும் வரை பின்னலாடை உற்பத்தி நிறுவனங்கள் இயங்கவில்லையெனில் அடுத்த 6 மாதங்களுக்கு புதிய ஆர்டர்கள் கிடைக்காமல் போகும் அபாயம் உள்ளது. லட்சக்கணக்கான தொழிலாளர்கள் வேலையிழக்க நேரிடும். இதை தவிர்க்க பின்னலாடை ஏற்றுமதி நிறுவங்கள் உலக பையர்களிடம் வரும் கோடை, குளிர்காலத்திற்கான ஆர்டர்களை பெற மாதிரி ஆடைகளை தயாரிக்க மத்திய அரசு அனுமதி வழங்க வேண்டும். இந்த ஆடைகளை வெளிநாட்டு பையர்களுக்கு அனுப்பி புதிய ஆர்டர்கள் பெற வாய்ப்பு உள்ளது. இதற்காக பின்னலாடை ஏற்றுமதி நிறுவனங்களுக்கு குறைந்தளவு தொழிலாளர்களை வைத்து ஆடைகளை தயாரிக்க மத்திய அரசு அனுமதி வழங்க வேண்டும். மாதிரி ஆடைகளை வெளிநாடுகளுக்கு அனுப்பி புதிய ஆர்டர்கள் பெறவில்லையெனில் வரும் 6 மாதங்களுக்கு புதிய ஆர்டர்கள் கிடைக்காத சூழ்நிலை உள்ளது. இதனால், லட்சக்கணக்கான தொழிலாளர்களுக்கு வேலையிழக்கும் அபாயம் உள்ளது. பின்னலாடை உற்பத்தி சார்ந்த நிறுவனங்களை இயக்க மத்திய அரசு அனுமதி அளிக்க பிரதமர் நடவடிக்கை எடுக்க வேண்டும். இவ்வாறு அதில் கூறப்பட்டுள்ளது.