கொரோனா முன்னெச்சரிக்கை நடவடிக்கையாக சீல் வைக்கப்பட்ட பகுதிகளை திறக்கக்கோரி பொதுமக்கள் போராட்டம்

குன்னூர்,

நீலகிரி மாவட்டம் குன்னூரில் உள்ள ராஜாஜி நகரில் வசித்து வந்த 2 பேருக்கு, கொரோனா தொற்று உறுதி செய்யப்பட்டது. உடனே முன்னெச்சரிக்கை நடவடிக்கையாக ராஜாஜி நகரில் 3 கிலோ மீட்டர் சுற்றளவுக்கு தனிமைப்படுத்தப்பட்டது. அங்குள்ள சின்ன பள்ளிவாசல், மாடல் அவுஸ், உழவர் சந்தை, ரெய்லி காம்பவுண்ட், பழைய ஆஸ்பத்திரி லைன் ஆகிய பகுதிகள் சீல் வைத்து மூடப்பட்டது. மேலும் கடைகள் அனைத்தும் மூடப்பட்டது. வீட்டை விட்டு வெளியே வர தடை விதிக்கப்பட்டதால், பொதுமக்கள் வீடுகளுக்குள் முடங்கினர். ஆனால் தனிமைப்படுத்தப்பட்ட அந்த பகுதிகளில் வசித்து வருகிறவர்களுக்கு அத்தியாவசிய பொருட்கள் சரிவர கிடைக்கவில்லை. இதுகுறித்து பொதுமக்கள் புகார் தெரிவித்து வந்தனர். இதற்கிடையே சமீபத்தில் கொரோனா தொற்று பாதித்து தீவிர சிகிச்சை பெற்று வந்த ராஜாஜி நகரை சேர்ந்த 2 பேரும், குணமடைந்து வீடு திரும்பினார்கள்.

பொதுமக்கள் போராட்டம்

இந்த நிலையில் நேற்று குன்னூரில் தனிமைப்படுத்தப்பட்டு, சீல் வைக்கப்பட்ட பகுதிகளை திறக்கக்கோரி பள்ளிவாசல் பகுதி பொதுமக்கள் திடீரென போராட்டத்தில் ஈடுபட்டனர். பொதுமக்கள் 100-க்கும் மேற்பட்டோர் வீட்டை விட்டு வெளியே வந்து போராட்டம் நடத்தினர். மேலும் அவர்கள் சமூக இடைவெளியை கடைபிடிக்காமல் கூட்டமாக நின்றிருந்தனர். இதனால் அங்கு போலீசார் அதிகளவில் குவிக்கப்பட்டனர்.

இதையடுத்து போராட்டத்தில் ஈடுபட்டவர்களிடம் போலீசார், வருவாய்த்துறையினர் பேச்சுவார்த்தை நடத்தினர். அப்போது தனிமைப்படுத்தப்பட்ட பகுதிகளில் வசிக்கும் பொதுமக்களுக்கு எவ்வித தடையும் இன்றி அத்தியாவசிய பொருட்கள் வழங்க ஏற்பாடு செய்யப்படும் என்று அதிகாரிகள் உறுதி அளித்தனர். அதன்பின்னர் பொதுமக்கள் கலைந்து சென்றனர். இந்த சம்பவத்தால் அங்கு 2 மணி நேரம் பரபரப்பு ஏற்பட்டது.