ஊரடங்கு கட்டுப்பாடுகள் தளர்வு: ஓட்டல்கள், கடைகள் திறப்பு சாலைகளில் போக்குவரத்து நெரிசல்

புதுச்சேரி,

உலகத்தையே ஆட்டிப் படைக்கும் கொரோனா வைரசை கட்டுப்படுத்த மத்திய, மாநில அரசுகள் பல நடவடிக்கைகள் எடுத்து வருகின்றன. இருந்தபோதிலும் கொரோனாவின் கோர தாண்டவம் இன்னும் குறையாததால் 3-வது கட்டமாக வருகிற 17-ந் தேதி வரை ஊரடங்கு உத்தரவு நீட்டிக்கப்பட்டுள்ளது. அதேசமயம் கட்டுப்பாடுகளை புதுவை அரசு ஓரளவு தளர்த்தி அறிவித்துள்ளது. இதனால் புதுவை, காரைக்கால் மாவட்டங்களில் ஓட்டல்கள், கடைகள் வழக்கம்போல் திறக்கப்பட்டன.

புதுச்சேரியில் நேற்று காலை வழக்கம்போல் மளிகை, காய்கறி, இறைச்சி, மீன்கடை, பேக்கரி, ஓட்டல்கள், எலக்ட்ரிக்கல், டூவீலர் மெக்கானிக், செல்போன் கடைகள் என சுமார் 70 சதவீதம் கடைகள் திறக்கப்பட்டன. இதனால் பொதுமக்கள் வழக்கம்போல் வீடுகளில் இருந்து வெளியே வந்து தங்களுக்கு தேவையான பொருட்களை வாங்கி சென்றனர். சாலையில் வாகனங்களின் பெருக்கமும் அதிகமாக இருந்தது.

மக்கள் நடமாட்டம்

மேலும் புதுவையில் நேற்று காலை வழக்கம்போல் மின்சாதன பொருட்கள் விற்பனை செய்யும் கடைகள், கட்டிடம் மற்றும் கட்டுமான பணிகளுக்கு தேவையான இரும்பு, சிமெண்டு, சானிட்டரி வேர் என அனைத்து கடைகளும் திறக்கப்பட்டன. இதனால் சாலைகளில் பொது மக்களின் நடமாட்டம் வழக்கம்போல் காணப்பட்டது.

இதுமட்டுமின்றி சுய தொழில் செய்யும் நபர்கள் அனைவரும் வீடுகளில் இருந்து புறப்பட்டு தங்களது கடைகளுக்கு சென்றனர். ஊரடங்கு உத்தரவால் கடந்த 40 நாட்களாக வீடுகளில் முடங்கி இருந்த பொதுமக்கள் நேற்று வெளியே வழக்கம்போல் சுற்றித் திரிந்ததால் அவர்கள் மகிழ்ச்சி அடைந்தனர். கலெக்டர் அலுவலகம், 5 ரோடு, 4 ரோடு, புதிய பஸ் நிலையம், நெல்லித்தோப்பு உள்ளிட்ட பகுதிகளில் சாலையில் வாகனங்கள் அணி வகுத்து சென்றதால் பல இடங்களில் போக்குவரத்து நெரிசல் ஏற்பட்டது. அதை சரி செய்யும் பணியில் போலீசார் ஈடுபட்டனர்.

சமூக இடைவெளி இல்லை

நேரு வீதி, காந்தி வீதியில் நேற்று அனைத்து கடைகளும் திறந்து வழக்கம்போல் வியாபாரம் நடைபெற்றது. இதனால் ஏராளமான பொதுமக்கள் அத்தியாவசியப் பொருட்களை வாங்குவதற்காக அங்கு திரண்டனர். பின்னர் அவர்கள் சமூக இடைவெளியை சரிவர கடைபிடிக்காமல் மளிகை பொருட்களை வாங்கி சென்றனர். இந்த வீதிகளில் சிறிய ஜவுளி கடைகள் ஏராளமாக உள்ளன. ஆனால் இந்த கடைகள் அனைத்தும் திறக்கப்படாததால் அந்த பகுதி வெறிச்சோடி காணப்பட்டது.

அதேநேரத்தில் நகராட்சி பகுதியில் உள்ள வணிக வளாகங்கள் எதுவும் செயல்படவில்லை. மத்திய அரசு அறிவித்துள்ள ஊரடங்கு உத்தரவு வருகிற 17-ந் தேதி வரை தொடர்ந்து அமலில் இருப்பதால் 5 பேருக்கு மேல் ஒரு இடத்தில் கூடுவதை தவிர்க்க வேண்டும், சமூக இடைவெளியை முறையாக பின்பற்றவேண்டும், அனைவரும் முக கவசம் கண்டிப்பாக அணிய வேண்டும் உள்ளிட்ட பல்வேறு உத்தரவுகளை கடைபிடிக்க வேண்டும் என்று அதிகாரிகள் கேட்டுக் கொண்டுள்ளனர்.

இதே போல வில்லியனூர், பாகூர், திருபுவனை, திருக்கனூர், மதகடிப்பட்டு உள்பட மாவட்டத்தில் பல்வேறு இடங்களிலும் நேற்று கடைகள் வழக்கம் போல் திறந்து இருந்தன. இதனால் சாலைகளில் பொதுமக்களின் நடமாட்டம் சற்று அதிகமாகவே காணப்பட்டது.