பீகார் மாநிலத்தை சேர்ந்த 1,601 பேர் ரெயில் மூலம் சொந்த ஊர் பயணம்

ஈரோடு,

ஈரோடு மாவட்டத்தில் வேலை செய்து வரும் வட மாநில தொழிலாளர்களை அவர்களின் சொந்த மாநிலத்துக்கு அனுப்பி வைக்கும் நடவடிக்கைகள் கடந்த சில நாட்களாக நடந்து வருகிறது. ஏற்கனவே சொந்த ஊர்களுக்கு திரும்ப விருப்பம் தெரிவித்து விண்ணப்பித்தவர்களின் எண்ணிக்கையின் அடிப்படையில் அவர்கள் அனுப்பி வைக்கப்பட்டு வருகிறார்கள்.

ஈரோடு மாவட்டத்தில் இருந்து சுமார் 17 ஆயிரம் வட மாநில தொழிலாளர்கள் தங்கள் சொந்த மாநிலம் திரும்ப விண்ணப்பித்து இருந்தனர். தற்போது பல பகுதிகளில் தொழிற்சாலைகள் இயங்க தொடங்கி இருப்பதால் அதில் பலரும் தொடர்ந்து வேலை செய்ய முன்வந்து இருக்கிறார்கள். மற்றவர்கள் மாநிலம் வாரியாக அனுப்பி வைக்கப்பட்டு வருகிறார்கள்.

அதன்படி கடந்த 20-ந் தேதி முதல் கட்டமாக உத்தரபிரதேசத்தை சேர்ந்த தொழிலாளர்கள் 1,464 பேர் ரெயில் மூலம் அனுப்பி வைக்கப்பட்டனர். 2-வது கட்டமாக 21-ந்தேதி ஒடிசாவை சேர்ந்த 1,464 பேர் சொந்த ஊர்களுக்கு புறப்பட்டு சென்றனர். அதைத்தொடர்ந்து 22-ந்தேதி ஜார்க்கண்ட் மாநிலத்தை சேர்ந்த தொழிலாளர்கள் 1,464 பேர் 3-ம் கட்டமாக தங்களது சொந்த ஊர் புறப்பட்டனர்.

இந்த நிலையில் ஈரோடு மாவட்டத்தில் இருந்து 4-வது கட்டமாக பீகார் மாநிலத்தை சேர்ந்த 1,601 பேர் தங்களது சொந்த ஊர்களுக்கு நேற்று அனுப்பி வைக்கப்பட்டனர். இவர்களுக்கான சிறப்பு ரெயில் நேற்று ஈரோடு ரெயில் நிலையத்தில் இருந்து இயக்கப்பட்டது. இதை முன்னிட்டு ஈரோடு மாவட்டத்தின் பல பகுதிகளில் இருந்தும் பீகார் மாநிலத்தை சேர்ந்த தொழிலாளர்கள் ஈரோட்டுக்கு அழைத்துவரப்பட்டனர்.

முன்னதாக அவர்கள் ஈரோடு மாநகர் பகுதியில் உள்ள பல்வேறு திருமண மண்டபங்களில் தங்க வைக்கப்பட்டு இருந்தனர். பின்னர் தொழிலாளர்கள் அனைவருக்கும் மருத்துவ பரிசோதனை செய்யப்பட்டது. உணவும் வழங்கப்பட்டது. அனைவருக்கும் அதிகாரிகள் அறிவுரைகள் வழங்கினார்கள்.

அதைத்தொடர்ந்து பிற்பகல் 3 மணிக்கு அனைவரும் ஈரோடு ரெயில் நிலையத்துக்கு அழைத்து வரப்பட்டனர். பின்னர் சமூக இடைவெளி விட்டு வரிசையில் நின்ற பீகார் மாநில தொழிலாளர்கள் ஒவ்வொருவராக ரெயில் நிலையத்துக்குள் அனுமதிக்கப்பட்டனர். அவர்கள் ரெயிலில் ஏறி தங்களது இருக்கையில் அமர்ந்தனர். மாலை 6 மணிக்கு பீகார் மாநிலத்தை சேர்ந்த 1,601 பேருடன் ரெயில் புறப்பட்டு சென்றது. தொழிலாளர்களை ரெயில் மூலம் அனுப்பி வைக்கும் பணிகளை ஈரோடு மாவட்ட கலெக்டர் சி.கதிரவன், போலீஸ் சூப்பிரண்டு எஸ்.சக்தி கணேசன் ஆகியோர் பார்வையிட்டனர். ரெயில் நிலையத்துக்குள் பிற நபர்கள் யாரும் அனுமதிக்கப்படவில்லை.