சேலம் பள்ளப்பட்டியில் ரூ.5¾ கோடியில் அறிவியல் பூங்கா கட்டுமான பணிகள் மாநகராட்சி ஆணையாளர் சதீஷ் ஆய்வு

சேலம், 

சேலம் மாநகராட்சிக்குட்பட்ட பகுதிகளில் ஸ்மார்ட் சிட்டி திட்டத்தின் கீழ் ரூ.933 கோடியே 13 லட்சத்தில் பல்வேறு வளர்ச்சி திட்டப் பணிகள் மேற்கொள்ளப்பட்டு வருகிறது. அதன் அடிப்படையில், அறிவியல் தொழில்நுட்பம் சார்ந்த அறிவுத்திறனை வளர்த்துக் கொள்ள சூரமங்கலம் மண்டலத்திற்குட்பட்ட பள்ளப்பட்டி பகுதியில் 13 ஆயிரம் சதுர அடியில் ரூ.5 கோடியே 80 லட்சத்தில் அறிவியல் பூங்கா அமைப்பதற்கான கட்டுமான பணிகள் தொடங்கி நடைபெற்று வருகிறது. இந்த பணிகளை மாநகராட்சி ஆணையாளர் சதீஷ் நேற்று நேரில் ஆய்வு செய்தார். அப்போது அவர் கூறியதாவது:-

மாநகராட்சி பகுதிகளில் வசிக்கக்கூடிய குழந்தைகள், இளைஞர்கள், பள்ளி, கல்லூரி மாணவ, மாணவிகள் முதல் முதியோர் வரை தங்கள் அறிவியல் திறனை மேம்படுத்திடும் வகையில் அறிவியல் பூங்கா அமைக்கப்பட்டு வருகிறது.

ராக்கெட் மாதிரிகள்

மேலும் இதில் சுகாதாரமான பழக்க வழக்கங்களை கையாளுதல், மனித உடல்களில் ஏற்படக்கூடிய நோய்கள் மற்றும் அவை பரவும் விதம் குறித்து பொதுமக்களுக்கு விளக்கும் வகையில் அறிவியல் தொழில்நுட்பத்துடன் கூடிய தகவல் பலகைகள் வைக்கப்பட உள்ளது. மாணவ, மாணவிகள் விண்வெளி ஆய்வுகள் சார்ந்த திறனை வளர்த்துக்கொள்ளும் வகையிலும், இந்தியாவில் விண்வெளி ஆய்வுகளுக்காக பயன்படுத்தும் ஜி.எஸ்.எல்.வி. மற்றும் பி.எஸ்.எல்.வி. ராக்கெட் மாதிரிகள் அமைக்கப்பட உள்ளது. விண்வெளியில் ஏற்படும் சந்திர, சூரிய கிரகணங்கள் போன்ற நிகழ்வுகளை பொதுமக்கள் கண்டுகளிக்கும் வகையில், 30 பேர் அமர்ந்து காணக்கூடிய கோளரங்கம் அமைக்கப்பட உள்ளது. சூரியசக்தி மூலம் செயல்படும் வானொலி சாதனம், ஒளி அலைகளின் இயக்க முறை செயல்பாடுகள் உள்ளிட்ட 18 வகையான அறிவியல் தொழில்நுட்பம் சார்ந்த செயல்முறைகள் காட்சிப்படுத்தப்படும்.

குழந்தைகள் மற்றும் இளைஞர்களை ஊக்குவிக்கும் வகையில் கண்டுபிடிப்பு மையம் அமைக்கப்படவுள்ளது. மேலும், டைனோசர் போன்ற அரிய விலங்குகள் தொடர்பான தகவல்களுடன் அவற்றின் மாதிரிகளும் அமைக்கப்படவுள்ளது. உள்அரங்கில் 18 வகையான அறிவியல் சார்ந்த பொருட்களின் கண்காட்சி மற்றும் விளையாட்டு உபகரணங்கள் அமைக்கப்படும். இவ்வாறு அவர் கூறினார்.