சேலம் செவ்வாய்பேட்டையில் பாதாள சாக்கடை திட்டப்பணிக்கு பொதுமக்கள் எதிர்ப்பு அதிகாரிகளுடன் வாக்குவாதம்

சேலம்,

சேலம் மாநகராட்சி 28-வது வார்டுக்கு உட்பட்ட செவ்வாய்பேட்டை பகுதியில் மாநகராட்சி சார்பில் பாதாள சாக்கடை திட்டப்பணிகள் நடைபெற்று வருகின்றன. குறிப்பாக அப்புச்செட்டி தெரு, சின்ன எழுத்துக்காரர் தெரு உள்ளிட்ட பகுதிகளில் கடந்த 4 மாதங்களுக்கு முன்பு பாதாள சாக்கடை பணிக்காக சாலையில் தோண்டப்பட்ட குழிகள் மூடப்படாமல் உள்ளது. இதனால் அப்பகுதியில் வசிக்கும் மக்கள் மிகவும் சிரமத்திற்கு உள்ளாகி வருகின்றனர்.

இதனிடையே, கடந்த சில நாட்களுக்கு முன்பு சாலையில் மூடப்படாமல் இருந்த குழியில் முதியவர் ஒருவர் தவறி விழுந்து உயிரிழந்த சம்பவம் சேலத்தில் பரபரப்பை ஏற்படுத்தியது.

பொதுமக்கள் எதிர்ப்பு

இந்தநிலையில், செவ்வாய்பேட்டை பெரிய எழுத்துக்காரர் தெருவில் பாதாள சாக்கடை திட்டப்பணிகளுக்காக சாலையில் குழிகள் தோண்ட மாநகராட்சி பணியாளர்கள் நேற்று முயற்சி மேற்கொண்டனர். இதற்காக பொக்லைன் எந்திரங்கள் அங்கு வரவழைக்கப்பட்டன.

அப்போது அந்த பகுதியில் உள்ள பொதுமக்கள், சாக்கடை திட்டப்பணிக்கு குழிகள் தோண்டக்கூடாது என எதிர்ப்பு தெரிவித்தனர். ஏற்கனவே பாதாள சாக்கடை திட்டத்திற்கு தோண்டப்பட்ட குழிகளை மூடி சரி செய்து விட்டு இந்த பகுதியில் குழி தோண்ட வேண்டும் என்று வலியுறுத்தினர்.

பேச்சுவார்த்தை

மேலும் இதுபோன்ற பணிக்காக தோண்டப்படும் போது குடிநீர் குழாய் உடைப்பு ஏற்பட்டு அதற்கான செலவுத்தொகையை பொதுமக்களிடையே வசூலிப்பது குறித்து அதிகாரிகளிடம் கேட்டு கடும் வாக்குவாதத்தில் ஈடுபட்டனர். இதனால் அங்கு பரபரப்பு ஏற்பட்டது. இதைத்தொடர்ந்து சம்பவ இடத்திற்கு வந்த செவ்வாய்பேட்டை போலீஸ் இன்ஸ்பெக்டர் சுந்தராம்பாள் மற்றும் போலீசார் பொதுமக்களிடையே சமாதான பேச்சுவார்த்தை நடத்தினர்.

இதையடுத்து பழைய குழிகளை மூடி சரி செய்து போக்குவரத்திற்கு வழி வகை செய்த பின்னர் புதிய பணிகளை தொடங்குவதாக மாநகராட்சி அதிகாரிகள் உறுதியளித்தனர். அதன்பிறகு பொது மக்கள் அங்கிருந்து கலைந்து சென்றனர்.