வில்லியனூரில் பட்டப்பகலில் சம்பவம் விடுதலை சிறுத்தைகள் பிரமுகருக்கு சரமாரி கத்திவெட்டு

வில்லியனூர்,

வில்லியனூர் அருகே உள்ள ஆரியப்பாளையத்தை சேர்ந்தவர் தேவா (வயது 40). விடுதலை சிறுத்தைகள் கட்சி பிரமுகர். இவர் நேற்று மதியம் 1.30 மணியளவில் வில்லியனூர் கொம்யூன் பஞ்சாயத்து அருகே உள்ள ஓட்டலில் சாப்பிட வந்தார்.

அப்போது ஓட்டல் எதிரே பதுங்கியிருந்த மர்மநபர் தேவாவை பின்தொடர்ந்து சென்று கத்தியால் வெட்டினார். இதில் நிலைகுலைந்த அவரை சரமாரியாக வெட்டி விட்டு, மோட்டார் சைக்கிளில் தப்பிச்சென்றார். கழுத்து, தலை, கை உள்ளிட்ட பகுதியில் வெட்டு விழுந்தது. இதில் ரத்த வெள்ளத்தில் துடிதுடித்த அவர் அங்கேயே மயங்கி விழுந்தார்.

வில்லியனூர் போலீஸ் நிலையம் அருகில் பட்டப்பகலில் இந்த சம்பவம் நடந்தது. அப்போது அந்த வழியாக சென்ற பொதுமக்கள், இந்த சம்பவத்தை பார்த்து அலறி அடித்துக்கொண்டு ஓட்டம் பிடித்தனர்.

கட்டிட தொழிலாளி கைது

தகவல் அறிந்த போலீஸ் இன்ஸ்பெக்டர் பழனிவேல், சப்-இன்ஸ்பெக்டர் குமார் மற்றும் போலீசார் சம்பவ இடத்துக்கு விரைந்து வந்தனர். அவர்கள், உயிருக்கு ஆபத்தான நிலையில் இருந்த தேவாவை மீட்டு, கதிர்காமம் இந்திராகாந்தி அரசு மருத்துவக்கல்லூரி மருத்துவமனைக்கு அனுப்பி வைத்தனர். அங்கு அவருக்கு டாக்டர்கள் தீவிர சிகிச்சை அளித்து வருகின்றனர்.

இந்த சம்பவம் குறித்து போலீசார் வழக்குப்பதிவு செய்து விசாரணை நடத்தினர். விசாரணையில், தேவாவுக்கும் அவரது எதிர்வீட்டை சேர்ந்த கட்டிட தொழிலாளி முருகன் (42) என்பவருக்கும் கடந்த சில நாட்களுக்கு முன்பு பிரச்சினை ஏற்பட்டது. இது தொடர்பாக வில்லியனூர் போலீஸ் நிலையத்தில் வழக்கு உள்ளது. இந்த முன்விரோதம் காரணமாக தேவாவை முருகன் கொலை செய்ய முயன்றது தெரியவந்தது. இதையடுத்து முருகனை போலீசார் கைது செய்தனர். அவரிடம் தொடர்ந்து விசாரித்து வருகின்றனர்.