ஜெயங்கொண்டத்தில், காணாமல் போன 2 சிறுமிகள் மீட்பு - போக்சோ சட்டத்தில் 3 சிறுவர்கள் கைது

ஜெயங்கொண்டம், 

அரியலூர் மாவட்டம், ஜெயங்கொண்டம் விசாலாட்சி நகரை சேர்ந்த ஒரே குடும்பத்தை சேர்ந்த 14 வயது மற்றும் 15 வயது சிறுமிகள் கடலூர் மாவட்டம், பரங்கிப்பேட்டையில் உள்ள ஒரு பள்ளியில் முறையே 9-ம் வகுப்பு மற்றும் 11-ம் வகுப்பு படித்து வருகின்றனர். கொரோனா காரணமாக தற்போது பள்ளிகள் மூடப்பட்டுள்ளதால் இருவரும் வீட்டிலேயே இருந்து வந்தனர். 

இந்நிலையில் இந்த சிறுமிகளுக்கும், பெரியவளையம் கிராமத்தை சேர்ந்த 17, 18 வயதுடைய 2 சிறுவர்களுக்கும் இடையே பழக்கம் ஏற்பட்டது. இந்த விஷயம் சிறுமியின் பெற்றோருக்கு தெரியவந்ததையடுத்து போலீஸ் நிலையத்தில் புகார் அளித்தனர். 

இதுதொடர்பாக ஜெயங்கொண்டம் போலீஸ் நிலையத்தில் வைத்து இரு தரப்பினரிடையே பேச்சு வார்த்தை நடத்தப்பட்டது. அப்போது இந்த பழக்கம் இனி தொடரக்கூடாது என்று சிறுவர்-சிறுமிகளை எச்சரித்து அனுப்பி வைக்கப்பட்டனர். இந்நிலையில் கடந்த 16-ந் தேதி இரவு, பீரோவிலிருந்த 7 பவுன் நகை, ரூ.2,500 மற்றும் பள்ளிச் சான்றுகள் ஆகியவற்றுடன் சிறுமிகள் இருவரும் மாயமாகினர். 

அவர்களை ஜெயங்கொண்டம் போலீசார் தேடி வந்தனர். இந்தநிலையில் ஜெயங்கொண்டம் பஸ் நிலையத்தில் நின்று கொண்டிருந்த 2 சிறுமிகள் மற்றும் 3 சிறுவர்களை போலீசார் பிடித்து சென்று விசாரணை நடத்தினர். பின்னர், சிறுமிகள் இருவரும் பெற்றோரிடம் ஒப்படைக்கப்பட்டனர். சிறுவர்கள் 3 பேரும் போக்சோ சட்டத்தின் கீழ் கைது செய்யப்பட்டு திருச்சி மத்திய சிறையில் அடைக்கப்பட்டனர்.