திண்டுக்கல்லில் தனியார் பள்ளி ஊழியர் கொலை: 16 வயது சிறுவன்-வாலிபர் கைது; ஓரின சேர்க்கைக்கு மறுத்ததால் தீர்த்து கட்டிய கொடூரம்

திண்டுக்கல் கோவிந்தாபுரம் பகுதியை சேர்ந்தவர் மணிகண்டன் (வயது 49). இவர், திண்டுக்கல்லில் உள்ள ஒரு தனியார் பள்ளியில் ஊழியராக வேலை செய்து வந்தார். இந்த நிலையில் கடந்த 4-ந் தேதி அவர் வீட்டில் இருந்து வெளியே சென்றார். அதன்பின்னர் அவர் வீட்டுக்கு திரும்பி வரவில்லை. இதனால் மணிகண்டனை அவருடைய குடும்பத்தினர் தேடி வந்தனர்.

இதற்கிடையே கடந்த 6-ந்தேதி ஆர்.எம்.காலனி மின்மயானம் பின்னால் உள்ள சுடுகாட்டில், நிர்வாண நிலையில் மணிகண்டன் பிணமாக மீட்கப்பட்டார். சுடுகாட்டில் உள்ள காத்திருப்போர் கூடத்தின் இரும்பு தூணில் மணிகண்டன் கட்டி வைக்கப்பட்டு வயிற்றில் கத்தியால் குத்தி கொல்லப்பட்டு இருந்தார். இதுகுறித்து திண்டுக்கல் மேற்கு போலீசார் வழக்குப்பதிவு செய்து விசாரணை நடத்தினர்.

இதையடுத்து போலீஸ் சூப்பிரண்டு ரவளிபிரியா உத்தரவின்பேரில் திண்டுக்கல் நகர போலீஸ் துணை சூப்பிரண்டு மணிமாறன் தலைமையில் மேற்கு இன்ஸ்பெக்டர் வினோதா, சப்-இன்ஸ்பெக்டர்கள் இளஞ்செழியன், வீரபாண்டி, நல்லதம்பி, குமார், சுரேஷ்குமார், ஏட்டுகள் ஜார்ஜ் எட்வர்ட், ராதாகிருஷ்ணன் ஆகியோரை கொண்ட தனிப்படை அமைக் கப்பட்டது. இந்த தனிப்படை போலீசார் பல்வேறு கோணங்களில் விசாரணை நடத்தினர்.

மேலும் நகர் முழுவதும் 50-க்கும் மேற்பட்ட இடங்களில் பொருத்தப்பட்ட கண்காணிப்பு கேமராக்களில் பதிவான காட்சிகளை போலீசார் ஆய்வு செய்தனர். இதில் மணிகண்டனை, 2 பேர் மோட்டார் சைக்கிளில் அழைத்து செல்லும்காட்சி பதிவாகி இருந்தது. எனவே, மணிகண்டனை அழைத்து சென்ற நபர்கள் குறித்து தனிப்படையினர் விசாரித்தனர்.

விசாரணையில், மணிகண்டனை அழைத்து சென்றது மேற்கு மீனாட்சிநாயக்கன் பட்டி பகுதியை சேர்ந்த சிவகுமார் (வயது 21), திண்டுக்கல் பாலதிருப்பதி பகுதியை சேர்ந்த 16 வயது சிறுவன் ஆகியோர் என்பது தெரியவந்தது. அதில் சிவகுமார் மீது மோட்டார் சைக்கிள்கள் திருட்டு வழக்கு உள்ளது குறிப்பிடத்தக்கது.

இதையடுத்து 2 பேரையும் தனிப்படை போலீசார் பிடித்து விசாரித்தனர். அதில் அவர்கள் 2 பேரும் சேர்ந்து, மணிகண்டனை கொலை செய்ததை ஒப்புகொண்டனர். இதைத் தொடர்ந்து 2 பேரையும் போலீசார் கைது செய்தனர். இது குறித்து போலீசார் கூறியதாவது:-

கடந்த 5-ந்தேதி நள்ளிரவில் திண்டுக்கல்-பழனி சாலையில் மணிகண்டன் தனியாக நடந்து சென்றுள்ளார். அப்போது அந்த வழியாக சிவகுமார் மற்றும் 16 வயது சிறுவன் ஆகியோர் மோட்டார் சைக்கிளில் வந்தனர்.

நள்ளிரவில் தனியாக நடந்து சென்ற மணிகண்டனை பார்த்ததும், மோட்டார் சைக்கிளை நிறுத்தி அவரிடம் 2 பேரும் நைசாக பேச்சு கொடுத்தனர். அப்போது அவருக்கு மதுகுடிக்க விருப்பம் இருப்பதை அறிந்து, 2 பேரும் தங்களுடன் சேர்ந்து மதுகுடிக்க வரும்படி அழைத்தனர். அதை உண்மை என நம்பிய மணிகண்டன், அவர்களுடன் மோட்டார்சைக்கிளில் ஏறி சென்றார்.

ஆனால் அவரை சுடுகாட்டுக்கு அழைத்து சென்று, அங்கு ஓரின சேர்க்கையில் ஈடுபட முயன்றனர். இதற்கு மணிகண்டன் மறுப்பு தெரிவித்தார். இதனால் அவரை காத்திருப்போர் கூடத்தின் இரும்பு தூணில் கட்டி வைத்து ஓரின சேர்க்கையில் ஈடுபட முடிவு செய்தனர். அதற்காக ஆடைகளை களைந்து அவரை கட்டி வைத்து, ஓரின சேர்க்கையில் ஈடுபட முயன்றனர். அப்போது மணிகண்டன் சத்தம் போட்டதால், ஆத்திரம் அடைந்த 2 பேரும் கத்தியால் அவரை குத்தி கொலை செய்துள்ளனர்.

இவ்வாறு போலீசார் தெரிவித்தனர்.