அதிராம்பட்டினம் அருகே ரேஷன் கடை ஊழியர் அடித்துக்கொலை கொலையாளிகளுக்கு போலீசார் வலைவீச்சு

அதிராம்பட்டினம்,

தஞ்சை மாவட்டம், பட்டுக்கோட்டை மேலத்தெரு பகுதியை சேர்ந்தவர் சிவகுமார்(வயது46). இவரது மனைவி மகேஸ்வரி. இவர்களுக்கு 2 பெண் குழந்தைகள் உள்ளனர். அதிராம்பட்டினம் பேரூராட்சியில் உள்ள ஒரு ரேஷன் கடையில் சிவக்குமார் ஊழியராக பணிபுரிந்து வந்தார். இந்தநிலையில் நேற்று மதியம் ரேஷன் கடை முன்பு சிவக்குமார் நின்று கொண்டிருந்தார். அப்போது அங்கு வந்த மர்மநபர்கள் சிவக்குமாரை சரமாரியாக கைகளால் தாக்கினர். இதில் அவர் சம்பவ இடத்திலேயே ரத்தவெள்ளத்தில் பரிதாபமாக இறந்தார். தகவல் அறிந்த அதிராம்பட்டினம் போலீசார் சம்பவ இடத்திற்கு வந்து இறந்தவரின் உடலை கைப்பற்றி பிரேத பரிசோதனைக்காக அதிராம்பட்டினம் அரசு மருத்துவமனைக்கு அனுப்பி வைத்தனர்.

வலைவீச்சு

இதுகுறித்து மகேஸ்வரி அதிராம்பட்டினம் போலீஸ் நிலையத்தில் புகார் கொடுத்தார். அதன்பேரில் போலீஸ் இன்ஸ்பெக்டர் (பொறுப்பு) ஜவஹர் வழக்குப்பதிவு செய்து விசாரணை நடத்தி வருகிறார். மேலும் தஞ்சை போலீஸ் சூப்பிரண்டு சேகர் சஞ்சய் தேஷ்முக் சம்பவ இடத்திற்கு வந்து விசாரணை நடத்தினார். ரேஷன் கடை ஊழியர் மர்ம நபர்களால் அடித்துக்கொலை செய்யப்பட்ட சம்பவம் அப்பகுதியில் பெரும் பரபரப்பை ஏற்படுத்தி உள்ளது.