பெருந்துறை அரசு மருத்துவக்கல்லூரி மாணவ-மாணவிகள் வகுப்புகளை புறக்கணித்து திடீர் போராட்டம்; கல்வி கட்டணத்தை குறைக்க கோரி நடந்தது

பெருந்துறை அரசு மருத்துவ கல்லூரியில் படித்து வரும் முதலாம் ஆண்டு மற்றும் 2-ம் ஆண்டு மாணவ-மாணவிகள் 200 பேர், நேற்று காலை 10 மணி அளவில் திடீரென வகுப்புகளை புறக்கணித்தனர். பின்னர் கல்லூரி நுழைவுவாயில் முன்பு அனைவரும் ஒன்று திரண்டு தர்ணா போராட்டத்தில் ஈடுபட்டனர்.

இதுகுறித்து அவர்களிடம் கேட்டபோது கூறியதாவது:-

பெருந்துறை சாலை போக்குவரத்து மருத்துவக் கல்லூரியாக இருந்த இந்த கல்லூரியை, அரசு தன் பொறுப்பில் எடுத்து, அரசு மருத்துவ கல்லூரியாக மாற்றம் செய்து 2 ஆண்டுகளாகின்றன. ஆனால் இதுவரை கல்விக் கட்டணத்தை குறைக்கவில்லை. கல்வி கட்டணத்தை குறைக்கக்கோரி நாங்கள் ஓராண்டாக போராடி வருகிறோம். இதுவரை எந்தவொரு தீர்வும் எங்களுக்கு கிடைக்கவில்லை.

சிதம்பரம் சர்.முத்தையா செட்டியார் மருத்துவக் கல்லூரியை அரசே எடுத்துக்கொண்டு, அங்கு படித்து வரும் மாணவ-மாணவிகளுக்கு அரசு நிர்ணயித்த கட்டணத்தை தற்போது வசூலித்து வருகிறது. அதேபோல் எங்கள் கல்லூரியிலும் கல்வி கட்டணத்தை குறைக்க வேண்டும். மற்ற அரசு கல்லூரிகளை போல தங்கள் கல்லூரியிலும், குறைந்த கல்விக் கட்டணத்தை நிர்ணயித்து, தங்களுக்கு உதவ வேண்டும்.

இவ்வாறு மாணவ-மாணவிகள் கூறினார்கள்.

மேலும் கோரிக்கைகளை வலியுறுத்தி மாணவ-மாணவிகள் கோஷமிட்டனர். இந்த போராட்டம் சுமார் 1 மணி நேரம் நீடித்தது. இதைத்தொடர்ந்து மாணவ மாணவிகள், வகுப்பறைகளுக்கு செல்லாமல் விடுதிகளுக்கு சென்றனர். மாணவ-மாணவிகளின் இந்த திடீர் போராட்டத்தால் அந்த பகுதியில் பரபரப்பு ஏற்பட்டது.