மின்னணு எந்திரத்தில் வாக்களிப்பது எப்படி?

தமிழக சட்டமன்ற தேர்தல் அடுத்த மாதம் ஏப்ரல் 6-ந் தேதி நடைபெற இருக்கிறது. வருகிற 12-ந்தேதி வேட்பாளர்களின் மனு தாக்கல் தொடங்க உள்ளது. இதனால் தேர்தல் பணிகள் விறுவிறுப்பை அடைந்து உள்ளன.
நடைபெற உள்ள சட்டமன்ற தேர்தலில் வாக்காளர்கள் மின்னணு வாக்குப்பதிவு எந்திரத்தை பயன்படுத்தி வாக்களிக்க உள்ளனர் ‌. இதற்காக சிவகங்கை மாவட்டத்திலுள்ள காரைக்குடி, திருப்பத்தூர், சிவகங்கை, மற்றும் மானாமதுரை(தனி) ஆகிய 4 தொகுதிகளிலும் உள்ள 1,679 வாக்குச்சாவடிகளிலும் பயன்படுத்த தேவையான மின்னணு வாக்குப்பதிவு எந்திரங்கள் தயார் நிலையில் உள்ளன.
அதோடு சிவகங்கை பஸ் நிலையத்தில் நகராட்சி ஆணையாளர் அய்யப்பன் தலைமையில் தேர்தல் பிரிவு அதிகாரிகள் மின்னணு வாக்குப்பதிவு எந்திரத்தில் வாக்களிப்பது குறித்து பொதுமக்களுக்கு செயல்முறை விளக்கம் அளித்தனர்.
திருப்பத்தூர்
திருப்பத்தூர் பேரூராட்சிக்குட்பட்ட பஸ் நிலையத்தில் மின்னணு வாக்குப்பதிவு எந்திரத்தில் வாக்களிப்பது குறித்து செயல்முறை விளக்கம்  நேற்று நடைபெற்றது. இதில் புதிதாக அறிமுகம் செய்யப்பட்டுள்ள விவிபேட் எந்திரத்தின் செயல் முறைகள் குறித்தும் பொதுமக்களிடம் தேர்தல் நடத்தும் அலுவலர் சிந்து சிறப்புரையாற்றினார். இந்த எந்திரம் மூலம் வாக்காளர்கள் யாருக்கு வாக்களித்து உள்ளோம் என்பதை தெரிந்து கொள்ளலாம். புதிய வாக்காளர்கள் இந்த எந்திரத்தின் மூலம் வாக்களித்து செயல் முறைகளை தெரிந்து கொண்டனர். இதில் ஏராளமான கல்லூரி மாணவ-மாணவிகள் கலந்து கொண்டு அதன் செயல்பாட்டை கண்டறிந்தனர்.
நிகழ்ச்சிக்கு திருப்பத்தூர் சட்டமன்ற தொகுதியின் தேர்தல் நடத்தும் அலுவலர் ஜெயந்தி, தேர்தல் பிரிவு துணை தாசில்தார் கமலக்கண்ணன் ஆகியோர் முன்னிலை வகித்தனர். மேலும் திருப்பத்தூர் வருவாய் ஆய்வாளர் செல்வம் மற்றும் கிராம நிர்வாக அலுவலர்கள் கலந்து கொண்டனர்.