கியாஸ் கசிவால் தீ விபத்து அடுத்தடுத்து 2 சிலிண்டர்கள் வெடித்து சிதறியது; 3 பேர் காயம்

தாம்பரம், 

சென்னையை அடுத்த குரோம்பேட்டை அருகே உள்ள அஸ்தினாபுரம் நேதாஜி நகர், ஏரிக்கரை பகுதியில் குடிசை வீட்டில் வசித்து வந்தவர் சரவணன் (வயது 53). இவருடைய மனைவி ஜெயக்கொடி (44). இருவரும் கட்டிட வேலை செய்து வருகின்றனர்.

நேற்று முன்தினம் இரவு ஜெயக்கொடி வீட்டில் சமையல் செய்ய முயன்றார். இதற்காக கியாஸ் சிலிண்டரை திறந்து வைத்துவிட்டு வெகுநேரம் கழித்து தீப்பற்ற வைத்ததாக தெரிகிறது. இதனால் கியாஸ் கசிந்து வீடு முழுவதும் பரவி இருந்ததால் குப்பென்று தீப்பிடித்து எரிந்தது.

சிலிண்டர்கள் வெடித்து சிதறியது

இதனால் அதிர்ச்சி அடைந்த ஜெயக்கொடி, வீட்டில் இருந்து உடனடியாக வெளியே ஓடிவந்து விட்டார். சிறிது நேரத்தில் வீட்டில் இருந்த கியாஸ் சிலிண்டர் வெடித்து சிதறியது.

இதை கண்ட அக்கம் பக்கத்தினர் தாம்பரம் தீயணைப்பு நிலையத்துக்கு தகவல் கொடுத்துவிட்டு, அவர்களே தண்ணீரை ஊற்றி தீயை அணைக்க முயற்சி செய்தனர். மேலும் வீட்டிலிருந்த மேலும் ஒரு சிலிண்டரை பத்திரமாக வெளியே கொண்டு வந்தனர்.

அதற்குள் அங்கு வந்த தீயணைப்பு வீரர்கள், குடிசையில் எரிந்த தீயை அணைக்க முயன்றனர். இதில் வீட்டில் இருந்த 3-வது சிலிண்டர் பயங்கர சத்தத்துடன் வெடித்து சிதறியது. பின்னர் தீயணைப்பு வீரர்கள் சிறிதுநேரம் போராடி தீயை அணைத்தனர். எனினும் குடிசை முற்றிலும் எரிந்து சாம்பலானது.

3 பேர் காயம்

அடுத்தடுத்து 2 சிலிண்டர்கள் வெடித்து சிதறியதால் அந்த பகுதியில் பெரும் பரபரப்பு ஏற்பட்டது. தீ விபத்தில் அப்பகுதியை சேர்ந்த வெங்கடேசன் (26) படுகாயம் அடைந்தார். மேலும் அப்பகுதியை சேர்ந்த செல்வக்குமார் (30) மற்றும் தீயணைப்பு வீரர் ரவிகுமார் (30) ஆகியோர் லேசான தீக்காயங்களுடன் உயிர் தப்பினர்.

பின்னர் காயமடைந்த 3 பேரும் குரோம்பேட்டை அரசு ஆஸ்பத்திரியில் சிகிச்சைக்கு அனுமதிக்கப்பட்டனர். இதுபற்றி சிட்லபாக்கம் போலீசார் வழக்குப்பதிவு செய்து விசாரித்து வருகிறார்கள்.நேற்று காலை சம்பவ இடத்துக்கு சென்று பார்வையிட்ட பல்லாவரம் தொகுதி தி.மு.க. எம்.எல்.ஏ. இ.கருணாநிதி பாதிக்கப்பட்ட குடும்பத்துக்கு நிவாரண பொருட்கள் மற்றும் ரூ.5 ஆயிரம் வழங்கி ஆறுதல் தெரிவித்தார்.