1,029 மருத்துவ பணியாளர்களுக்கு பணி நியமன ஆணை-அமைச்சர் மூர்த்தி வழங்கினார்

மதுரை கலெக்டர் அலுவலகத்தில் கொரோனா நோய் தொற்று தடுப்பு நடவடிக்கைகள் தொடர்பான ஆலோசனை கூட்டம் நேற்று நடந்தது. கலெக்டர் அனீஷ் சேகர் தலைமை தாங்கினார். மருத்துவ அலுவலர்கள் மற்றும் நர்சுகள் கலந்து கொண்டனர். கூட்டத்தில் புதிதாக 1.029 மருத்துவ பணியாளர்களுக்கு அமைச்சர் மூர்த்தி பணி நியமன ஆணைகளை வழங்கினார்.
அதன்படி மதுரை அரசு ராஜாஜி ஆஸ்பத்திரிக்கு 80 மருத்துவர்கள் மற்றும் 250 செவிலியர்கள் உள்ளிட்ட 729 பணியாளர்களுக்கும், பொதுசுகாதாரம் மற்றும் நோய் தடுப்புத்துறையின் கீழ் 40 மருத்துவர்கள் மற்றும் 75 செவிலியர்கள் உள்ளிட்ட 300 பணியாளர்களுக்கும் என மொத்தம் 1029 பணியாளர்கள் பணிநியமன ஆணைகளை பெற்றனர்.
கூட்டத்தில் அமைச்சர் மூர்த்தி பேசியதாவது;-
மதுரை மாவட்டத்திலுள்ள அனைத்து ஊராட்சிகளிலும் தற்போது வீடுவீடாக சென்று பெரியவர்கள் மற்றும் சிறியவர்களின் எண்ணிக்கையை கணக்கெடுக்கும் பணி நிறைவடைய உள்ளது. மேலும் சுகாதாரப் பணியாளர்களுடன் மகளிர் சுய உதவிக் குழு உறுப்பினர்களும் இணைந்து வீடுவீடாக சென்று காய்ச்சல் கண்டறியும் பரிசோதனையை மேற்கொண்டு வருகிறார்கள். பரிசோதனையின் போது நோய்த் தொற்று அறிகுறி இருப்பின் கிராம அளவிலேயே மினி கொரோனா கவனிப்பு மையத்தில் சிகிச்சை அளிக்கப்படுகிறது.
இவ்வாறு அவர் கூறினார்.
 இந்த நிகழ்ச்சியில் எம்.எல்.ஏ.க்கள் வெங்கடேசன், பூமிநாதன், மாவட்ட வருவாய் அலுவலர் செந்தில்குமாரி, ராஜாஜி மருத்துவமனை முதல்வர் ரத்னவேலு, சுகாதாரப்பணிகள் இணை இயக்குனர் வெங்கடாச்சலம், துணை இயக்குனர் (சுகாதாரம்) அர்ஜூன் குமார் உள்ளிட்ட பலர் கலந்து கொண்டனர